Hadien ka sngi laitluid yn rai iaka kam khaïi bad ka Bangladesh

Syllad | The Rising MeghalayaAugust 6, 2020

U District Magistrate, West Jaintia Hills District, u Garod LSN Dykes ula ong ba ha kaba iadei bad ka kam khaii pateng bad ka ri Bangladesh lyngba ka Land Custom Station, Dawki yn rai hadien ka 15 tarik u Nailar 2020.

Ia kane ka rai la shim haka jingialang kaba long ha Amlarem ha ophis jong ka SDO (C) Amlarem Subdivision mynta ka sngi Palei. La iadonlang ki nongialam shnong, dalloi bad ki sengbhalang ba kynthup iaka Khasi Students’ Union (KSU) War Jaintia Circle, ka Hynniewtrep National Youth Front Southern (HNYF), Riwar Circle, ka Federation of Khasi Jaintia and Garo People (FKJGP), War Jaintia Circle bad kiwei kiwei.

U DC ula ong ba ha kane ka jingialang la rai ban thaw da ka monitoring committee kaba ki nongialam shnong bad ki dalloi ruh kin long ki dkhot jong ka committee.

U Laitphar Syngkrem president KSU War Jaintia Circle, ula ong ba ka jingialang kala pdiang ia kane ka committee bad ula ong ba ka SDO Amlarem kan sa khot biang iaka jingialang ban pynbeit iaka rukom treikam kane ka committee khnang ban lah ban pyniaid beit iaka kam khaii bar ri lyngba ka LCS, Dawki katkum ki jingbthah jong ka tnad ka koit ka khiah.

Ka JSU kam sngew iahap iaka jingkhang khaii pateng bad ka ri Bangaldesh lyngba ka LCS Dawki

Kumban shu pynkynmaw u Deputy Magistrate, West Jaintia Hills Ma Garod LSN Dykes hadien ka jingpyrshah jong ki nongialam shnong bad sengbhalang ka thain War Jaintia ban plie iaka jingkhaïi bar ri hapdeng ka India bad Bangladesh lyngba ka kad khaii Land Custom Station, Tamabil, Dawki ula pyndam shipor iaka hukum kaba u la pynmih haka 6.7.2020 khnang ban pynbeit shuwa ia kane ka kam kaba lah ban ktah iaka shong suk shongsain u paidbah ha katei ka thain.