Hadien ka surok Lapangap, shna surok ka Assam sa na khlaw Khanduli sha Mokoiram

Syllad | The Rising MeghalayaNovember 25, 2020

Ka jingpyndik jong ka sorkar Assam iaki paidbah ka thain khappud kala sdang biang haka kyrteng ka roi ka par tang ban ioh klun jaka jubor ha ki jaka khappud ka shnong Khanduli, West Jaintia Hills District bad ka Mokoiram, West Karbi Anglong, Assam.

Kane ka jingshna surok ka sorkar Assam kaba la wanrah da ka puh shilum ban ot surok kala jia ha Wahsamynthu, Khanduli haduh Mukoiram uba jngai kumba 4 kilometre.

Ki nongialam shnong ka Khanduli kila leit jurip ia kane ka jaka haka sngi Nyngkong kaba la lah bad kila rai ba ujor sha u Deputy Commissioner, West Jaintia Hills District ban pynpaw iaka jingpyrshah namar ba kane ka jaka ka dang hap hapoh ka jingpeit jong ka shnong Khanduli.

Ki nongïalam Shnong hapoh ka jingïalam u Waheh Shnong u Yoshida Nongspung, Chairman Shnong u ma Womless Lyngshiang haka jingleit jurip jong ki kila lap ïa kawei ka puh shi lum kaba la lur bad puh khyndew ban pynheh pynïar ïa kane ka surok.

U Waheh Shnong u Yoshida Nongspung ula ïathuh ba ïa kane surok ka sorkar Assam ka la thmu ban ot surok bad pyntrei naduh u snem 2009, hynrei na ka jingpyrshah jong ki ka sorkar Assam kala sangeh, hynrie mynta kala sdang biang ban shna ia kane ka surok.

La kynnoh ba ka bor district kala shim sting halor kane ka kam bad kala pynlong iaka sorkar Assam ban pyrshang ban kyntur na ka por sha ka por sha kane ka thain.

“Ngim pyrshah ia kino kino ki kam pynroi, hynrei dei ban pyntip sha ka bor shnong bad ban pan jingbit shwa na ka Dorbar Shnong Khanduli namar ka jaka dei jong ka Dorbar Shnong Khanduli,” la ong u waheh shnong Khanduli.