Hadien ka thma iasiat jri bad ki Karbi, da ka jingshngain ioh leit ot ki Khasi Pnar ia u kba u khaw na ki pyntha

Syllad | The Rising MeghalayaOctober 3, 2023

Hadien ka thma iasiat jri bad ki paid Karbi ha ki thain khappud ka Meghalaya ba Assam, mynta ki nongshong shnong ka Lapangap, West Jaintia Hills da ka jingshngain ki la ioh lad pat ban leit noh ia u khaw u khaw na ki pyntha ki jong ki hapdeng ka jingshngain da ka jingsynran lang ki bor pulit ka ka Assam bad Meghalaya.

Kane ka la wan long ruh hadien ka jingpdiang jong ki bor pyniaid district jong ka West Jaintia Hills ia ka jingdawa jong ki Karbi ban phut noh ia ki tynrai dieng bala thung ha Lum Moo Pyrdet Pynthor hapoh ka shnong Lapangap.

Haba iakren bad u waheh Shnong ka Lapangap u Bah Deimonmi Lyngdoh ula ong ba hynne ka sngi ba Ar ki paid nongrep ka Lapangap kiba ia don hali ha Nongjrong ki la leit ban ot ia u kba lyiur uba la ih bha khlem kano kano ka jingshah pynthud.

Ula ong ba la phah 74 ngut ki nongshong shnong ban leit ot ia u kba na ki ar pata ba don haka shnong Nongjrong bad ha kane ka jingleit ot kba la synran lang ia ki nongshong Shnong ka Lapangap da ki pulit jong ka Assam bad Meghalaya haduh ban da poi ha ki hali pynthor ki jong ki ha Nongjrong.

Nalor kata ula iathuh ruh ba baroh ki 74 ngut ki nongshong shnong ki wanphai sha Lapangap da kaba suk kaba sain.

Lah ban kdew ba ka jingialeh markylliang lyngba ka jingiasiat da ki jri bad ki khnam ryntieh hapdeng ki paid Karbi bad ki Khasi Pnar kiba dei ki nongshong shnong ka Lapanagp ka la jia ha ka 26 bad 27 tarik u Nailur ba la dep kaba la wanrah ruh ia ka jingmynsaw jong ki katto katne ngut ki briew.

Hadien kane na ka liang ki bor district jong ki ar jylla ki la shimkhia mardor ban tem ia kane ka jingiakynad da kaba pynlong ia ka jingialang bad poi sha ka jingshim rai kaba la lah ban pynkut noh ia kane ka jingiakynad.