Hadien ki jri siat sim, pyndonkam u Karbi sa da ki khnam ki ryntieh ban siat pynma, lait thaw uwei ha Lapangap

Syllad | The Rising MeghalayaSeptember 26, 2023

Ha kine ki khyndiat bnai u Karbi ula pyndonkam da ki jri siat sim ban pynma ha khappud Assam Meghalaya, mynta pat kila pyndonkam sa da ki khnam ryntieh ban siat pynma ia ki Khasi Pnar ha khappud.

Kane ka jingjia kaba ki pyndonkam da ki khnam ki ryntieh kala jia haka 26 tarik Nailur bad lait thaw uwei u pulit pahara haka shnong Lapangap.

La kynnoh ba ki Karbi na ka thain Tahpat kila pynthud iaki Khasi Pnar ba leit rep leit riang kala sdang naduh u bnai Nailar jong une u snem. Ha kine ki khyndiat sngi ki siat da ki jri siat sim, bad la don ruh kiba mynsaw.

Kumban shu pynkynmaw ba wat ki Pulit jong ka Saitsama Outpost kiba pahara haka shnong Lapangap 26 tarik Nailar kila hap ban phet sha ki jaka ba shngain ban lait na ka jingshah kawang maw shah siat da ki jri siat sim.

La iathuh ba haka 26 atrik Nailur ka la don ka jingia kawang maw bad siat jri kaba mar kylliang hapdeng ki Pnar na Lapangap bad ki Karbi.

U Waheh shnong Lapangap u Deimonmi Lyngdoh ula iathuh ba ki nongrep ka shong shnong Lapangap ki la leit ban jngoh iaki lyngkha sha pynthor, hynrei ki Karbi kiba la ap lypa sha shilliang pynthor ki la siat iaki da ki jri siat sim.

Ula iathuh ki nong Karbi naduh mynstep ki ia ap lypa sharud pynthor bad haba ki nongrep ka shnong Lapangap ki leit ban jurip iaki um haka lyngkha, kila shah siat iaki da ki jri sim kaba la neh baroh shisngi.

Ula iathuh nalor ka jingkawang maw bad ka jingsiat jri, ki nong Karbi ki pyndonkam ruh da u khnam bad ryntieh ha kaba uwei u pulit ka jylla u lait salit na u khnam ki nong Karbi.

Ula iathuh ba na ka liang u pulit Assam ula ialeh ban khanglad iaki nong Karbi, hynrei ki Karbi kim patiaw eiei bad ki wan tur beit sha pynthor bad da ka jingbym banse ki nong Lapangap ruh ki la iamih da u paidbhur.