Hadien u Badonkupar Synnah jam shakhmat sa u Bhalang Shadap ha ka 7th Elite Men’s National Boxing Championship

Syllad | The Rising MeghalayaNovember 28, 2023

Hadien ka jingjam shakhmat jong u Badonkupar Synnah, mynta ki paidbah nongkyrshan ki la ia risa na ka bynta uwei pat u rangiakura ka jylla u Bhalang Shadap uba la lah ban pynliem noh ia u Enait Khan jong ka DNHDD (Dadra & Nagar Haveli, Daman & Diu) ha ka welterweight 63.5-67kg ha ka 7th Elite Men’s National Boxing Championship kaba la long haka sngi Nyngkong ha SAI Indoor Hall.

Ha kane ka jingiakhun u Shadap um shym la ailad ia u rangiakura uba ia aireng pyrshah, ha kaba u la pyni ia ka jingkhlain bor ban thom naphang bad dei ha ka wat kaba ar ba u rephri u la hap ban pynsngeh noh ia kane ka jingiakhun hadien ba u Khan u la mynsaw.

Kumba la long mynta u Shadap u la long uba ba ar napdeng ki rangiakura ka Jylla ban jam sha ka wat kaba ar hadien ba u Badonkupar Synnah (light welterweight 60-63.5kg) u la khur ia ka jingjop hynnin ka sngi.

Ki khlur iakura kum u Shiva Thapa uba la khur takma hynriew sien ha ka Asian Championship bad u rangiakura uba la khur ia ka takma ksiar ha ka Commonwealth Games 2022 u Amit Panghal, kine ki arngut ki la lah ban khur ia ka jingjop ha ka sngi kaba lai jong kane ka lympung iakura.

Haba phai sha ka jingiakhun, u Panghal na na Services, uba long u lahduh ha ka Asian Games 2018, u la khur jingjop ha ka flyweight 48-51kg pyrshah ia u Shivaji na Maharashtra lyngba ka jingiarai lang.

Kumjuh u Thapa na Assam u la iakhun tyngeh pyrshah ia u Abhinash Jamwal uba na Himachal Pradesh ha ka light welterweight 60-63.5kg bad hapdeng kane ka jingiakhun u la khur ia ka jingjop da 4-3. Une u rangiakura u la ioh ka jingkyrshan na kiba bun ki paidbah hynne ka sngi bad ha kaba kut u la lah ban khur ia ka jingjop ha kane ka jingiakhun ha kane ka nongbah.

Ym lah ban len ba u Jamwal u la long u rangiakura uba tbit ha kaba um shym la ailad ia u Thapa ban shu jop suk. Hapdeng kane ka jingiakhun kaba itynnad, hynrei na ka liang ki nongbishar ki la rai jop ia u Thapa na ka bynta ban pynhun ia ki paidbah nongkyrshan.

Ia kane ka lympung iakura ka ban kut ha ka 1 tarik u Nohprah, la pynlong da ka Meghalaya Boxing Association ha ryngkat ka Boxing Federation of India bad la kyrshan lang da ka tnat Sports and Youth Affairs jong ka Sorkar Jylla.

Ki don ar ngut kiwei pat ki rangiakura ka Jylla, hynrei ki la mad ia ka jingshah rem.

U Melvin Malngiang ha ka featherweight 54-57kg bad u Sanjeev Maskut ha ka 46-48kg, ki la shah rem noh ha u Himanshu Srivas bad u Ram Naresh Patel, kiba la mihkhmat na Madhya Pradesh. Baroh ar ngut kitei ki rangiakura ka Jylla ki la iakhun tyngeh, hynrei kane ka shong ha ka rai jong ki nongbishar.