Haduh 10 tarik Naiwieng ai por ka JYF bad JSM ban pynioh admission iaki khynnah pass matrik ha Jowai, kular shimkhia u CM

Syllad | The Rising MeghalayaNovember 5, 2021

U Chief Minister Conrad K Sangma haka sngi Thohdieng ula ong baka sorkar kala shimkhia ban pynbeit halor ka jingduh admission ki khynnah khamtam ha sor Jowai ka nongbah jong ka West Jaintia Hills District.

Ula ong ba jingkiew syndet ka jingthep admission ki khynnah ka dei naka jingwan lynsher ka khlam COVID-19 namar bym don shuh ki khynnah skul kiba leit pule shabar ka district bad ula ong ba ha u snem ban wan kane ka jingduh admission kan duna.

Ha Jowai ka jingduh admission ki khynnah la lah ban pynbeit da ka jingshimkhia u MLA ma Wailadmiki Shylla, ka tnad pule puthi bad ka bor district, la ong u Conrad bad ula bynrap ba ki don haduh 500-600 ngut kiba duh klas hynrei mynta kiba sah ki long sa tang kumba 150-180 ngut.

“Na kine 180 ngut kiba dun admission, ngi pynshlur ia ki khynnah ban phai khmat sha ki kolej kiba don shabar ka Jowai kum ha Amlarem, Shangpung ban shim admission sha kine ki kolej bad ym tang ha Jowai. Watla kata ruh ngin pyrshang ban wad ki lad ki lynti ban pynioh admission ia baroh ki khynnah skul,” la ong u CM

Ha kaba iadei bad kane ka jingduh admission ki khynnah skul, ka JYF, JSM ha ryngkat ki khynnah ba duh admission kila pynlong iaka peace rally ha lad Kiang Nangbah College Jowai.

Ki nongialam jong kine ki seng kila ioh ruh ban iakynduh ia u CM ha ophis treikam jong u Deputy Commissioner West Jaintia Hills. Ki nongialam ka JYF, JSM kila ai da ka dorkhat ban pynsngew halor ka jingbymioh jaka pule ki khynnah hapoh ka district.

Kine ki ar seng kila ai por ban pynioh admission iaki khynnah hapoh 10 Naiwieng 2021.