Haduh 15 hajar hap pynlut ki samla pule ka Tura Polytechnic tang na ka bynta ban thied um

Syllad | The Rising MeghalayaMarch 14, 2024

Ki samla pule ka Tura Polytechnic College ki la mad ia ka jingeh kaba khraw namar ki la hap ban sei na lade bad pynlut haduh kumba T.15,000 ban thied ia ka umbam umdih bad umsait umkhlieng namar ka jingkyrduh um hapoh ki hostel kiba ki shong ki sah.

Katkum ka jingpynpaw ka jong ki la ong ba ki bor ba dei khmih jong ka college ki la sngap Myntri wat hadien ba ki la phah da ka jingthoh la bun bunsien sha u Principal jong kane ka Institute.

Kumta ha ka 13 tarik mynta u bnai kine ki samla pule kiba la don hapdeng ka jingsngew kutlad hapoh k lama jong ka Tura Polytechnic Students’ Union (TPSU) ki la dawa na u Director of Higher and Technical Education (DHTE) ba un tuklar lem ha kaba iadei bad kane ka jingbym biang ha ka jingpynioh um hapoh ki hostel jong ki.

“Kane ka jingkyrduh um ka la iaid mynta lah palat shi bnai naduh ba ngi la sdang ia ki klas.Ngi la hap ban sei na lade haduh kumba T.15,000 tang na ka bynta ban thied um, bad mynta ngi la mad jingeh ha kaba iadei bad ka jinglah ban pynbiang ia ka bai bam bad ia ka um,” ong ka Seng lyngba katei ka shithi ujor.

Shuh shuh ka Union ka la ong ruh ba ka jingbym biang um ka la wanrah ka jingthut ha ki kam ki jam kiba man la ka sngi, kata naduh ha ka sum ka sait, ka shet ka tiew, ka um ban dih bad pynkhuid nalor kiwei pat ki jingdonkam.

Nalor kata ka la ong ruh ba ka jingbym don jong u khliehduh ba dei khmih jong ka Institute ha kane ka jaka ka la pynshem jingeh ia ki ba kin pynpaw ia kane ka jingeh kaba ki iakynduh.

Ha kajuh ka por ka Union ka la pyntip ruh ba ka la pynpaw ia kane ka jingeh kaba ki iakynduh sha u Principal naduh ka 19 tarik u bnai Rymphang ba la dep, hynrei ka long kaba sngewsih namar um shym la leh ei ei kat haduh mynta.