Haduh 15 ngut kiba iap, 347 ki iing ba shah pynjulor na ki jingjia shah lynshop mariang haka Jylla: Shylla

Syllad | The Rising MeghalayaOctober 9, 2024

“Ki la don haduh 15 ngut ki briew kiba la khlad noh, 6 ngut kiba mynsaw, 347 tylli ki iing ki sem kiba la shah pynjulor ha ki 246 tylli ki shnong na ki jingjia shah lynshop ha ki bor mariang ha West Garo Hills bad South Garo Hills District bad kiwei pat ki bynta ka Jylla,” ong u Myntri ka Tnad Revenue & Disaster Management u Bah Kyrmen Shylla ha ka 9 tarik u Risaw.

U Myntri u la ong ruh ba kane ka dei kawei na ki jingjia kaba shyrkhei tam kaba ka Rilum Garo ka la hap ban mad.

“Naduh ba nga la don ha ka sorkar, kane Nga lah ban ong ba kadei ka jingjia kaba shyrkhei tam kaba ngi la sakhi hapoh Rilum Garo,” ong u Bah Kyrmen da kaba bynrap, “Ngi la iohi ia ki jingshlei um na ka por sha ka por. Man la u snem ngi sakhi hynrei ka jingduh jong ki mynsiem briew ha kane ka kynti kaba mynta ka la kiew shaduh ka 15 ngut. Kalong kaba sngewsih shibun hynrei ngim lah ban leh ei ei, hynrei watla katta na ka liang ka Sorkar ha ryngkat ka jingiatreilang bad kiwei pat ki Tnad ki la pyrshang borbah ban poi sha baroh kiba haiing hasem jong kine ki lanot.”

U la ai khublei kyrpang ruh ia u Myntri Rangbah ka Jylla u Conrad K Sangma uba la shim ia ki sienjam da lade hi ban leit jurip sha baroh kito ki jaka kiba la shah ktah jur ha ka jingshlei um bad ki jingtwa khyndew kiba la wan jia namar u ‘lapbah.

“U CM u la pynpaw shisha ia ka jingdon mynsiem da kaba leit ban jurip da lade hi sha kito ki jaka kiba la shah ktah. Nga ai khublei ruh ia ki nongmihkhmat jong kito ki shnong namar ki la trei khlem sangeh kumjuh ban iarap wad bad sei ia ki metiap jong kito ki lanot kiba la khlad na ki jingjia twa khyndew,” u la ong.

Nalor kata u la ong ruh ba ka jingpynioh ia ki song jingiarap pisa sha kiba haiing hasem jong baroh ki lanot kiba la khlad noh la lah ban pyndep.

Napdeng kine ki jingjia shah pynjulor, ha West Garo Hills ki la don haduh 132 tylli ki shnong kiba la shah ktah, 93 tylli ki iing kiba la shah pynjulor, san ngut ki briew kiba khlad bad 3 ngut kiba mynsaw.

“Kumjuh ki la don haduh 79 tylli ki shnong kiba la shah ktah hapoh South Garo Hills, 224 tylli ki iing kiba shah pynjulor bad 7 ngut kiba iap. Ha East Garo Hills ki don 12 tylli ki shnong kiba shah ktah, kawei ka iing kaba julor, 3 ngut kiba iap bad 3 kiba mynsaw. Laitylli ki shnong ki la shah ktah ha North Garo Hills, 15 tylli ki shnong ha South West Garo Hills bad 8 tylli ki iing kiba shah pynjulor, 4 tylli ki shnong ki la shah ktah ha Eastern West Khasi Hills, kawei ka shnong ka la shah ktah bad kawei ka iing ka la shah pynjulor ha East Khasi Hills,” u la ong.

U Bah Kyrmen u pyntip ruh ba la buh ia kawei ka jaka shong shipor ha South Garo Hills bad 68 ha West Garo Hills. Kumba 6.28 lak ki nongshong shnong bad 655 tylli ki longiing ki la shah ktah bad ki la hap ban shong ha kine ki jaka shong shipor bad kiwei pat ki jaka ba la pynkhreh.

Haba kylla, une u Myntri u la ong ba ki jingjulor jong ki jingtei bad ki jingdon jingem ki la bun bah ha kane ka kynti kaba mynta bad ka jinglum jingkhein ka dang iai bteng haduh mynta. U la ong ruh ba ka Sorkar ka la shim ia ka sienjam ban shna bujli noh da kiwei ha ki jaka jong kine ki jingkieng dieng.

Ha kaba iadei bad ka jingshna bad maramot ia ki iing ki sem ba la shah pynjulor, u Myntri u la ong, “Ngin khmih kaei kaba ngi lah ban leh na ka liang ka jong ngi. Ia mynta hi ngi dang pyrshang ban pynkynriah ia baroh ki briew, ia baroh ki metiap la lah ban sei bad la dep ruh ban sam ia ki song jingiarap pisa,” u la bynrap.