Haduh 1745 tylli ki case POCSO ki dang sahteng ha ka Jylla, 894 la lah ban pynkut

Syllad | The Rising MeghalayaSeptember 1, 2024

Haduh 1747 tylli ki case POCSO ne ki mukotduma kam thombor ne leh beijot ia ki khynnah kynthei kiba dang hapoh rta ki dang sahteng hapoh ki kashari bapher bapher jong ki District ha ka Jylla naduh ba la sdang pyntreikam ia kane ka ain haduh u bnai Jylliew mynta u snem.

Ia kane la pyntip da u Myntri ka Tnasd Social Welfare u Bah Paul Lyngdoh haba jubab ia ka jingkylli ba la wanrah ha kaba kut jong ka Dorbar Synrai ba san sngi jong ka Iingdorbar thaw ain.

Haba kdew halor kiba bun ki daw bapher bapher halor kane ka jingsahteng, u Bah Paul u la ong ba ki don hynriew tylli ki POCSO Special Court ha ka Jylla kiba khmih bad shim bishar tang halor ki mukotduma POCSO, kata artylli ki East Khasi Hills bad mar kwei ha West Khasi Hills, West Jaintia Hills, Ri Bhoi bad West Garo Hills.

Nalor kata ki Judicial Megistrate ki shim bishar ruh halor kiwei pat ki mukotduma hapoh ka iingbishar nalor ki mukotduma POCSO hapoh la ki jong ki District Court.

“Ka jingpynslem ban pyndep ia ka jingbishar namar ka jingbym wan mih da ki nongshah kynnoh, ki lanot, ki sakhi bad kiwei pat ki daw ka dei kawei na ki daw jong ka jingpynslem ban pyndep ia ka jingbishar,” ong u Bah Paul.

U la ong ruh ba ka jingbym wan mih da ki kynhun kiba don bynta na kiba bun ki daw, kata kum ki jingpang jingshitom, ki eksam bad kiwei pat ki la nangpynjlan ia ka jingtian bishar, kata watla ki Kashari ki la shimkhia ban pynlong ia ka jingtian bishar kaba khlem shah liang na ka bynta baroh ki kynhun.

Nalor kata u Myntri u pyntip ruh ba haduh kumba 894 tylli ki POCSO Case la lah ban pyndep ia ka jingshim bishar bad pynkut noh ia ka case kat haduh u bnai Jylliew 2024.

U Myntri u la ong ruh ba ki dang don haduh 280 tylli ki case kiba dang sahteng hapoh ka Juvenile Justice Board kat haduh u quarter ba kut jong u bnai Jylliew 2024, kata naduh u bnai Iaiong 2024 haduh u Jylliew 2024.

Ha kaba iadei bad ki daw jong ka jingsahteng, u Bah Paul u la ong ba ka jingkiew ha ka jingdon jong ki case ba la leh da ki khynnah ha ka jingiatyngkhuh bad ka ain ka la nangkynton ia ka jingtreikam jong ka Juvenile Justice Board bad kane ka la wanrah ia ka jingsahteng ban lah ban pyndep ia ki case katkum ka por ba dei ban pyndep.