Haduh 18 pyrton ki bor pahara pan ka Meghalaya na ka bynta ka ilekshon MP ka ban wan

Syllad | The Rising MeghalayaMarch 20, 2024

Ka sorkar Jylla ka la pan haduh 18 pyrton ki bor pahara khnang ban lah ban pynlong ia kane ka ilekshon Lok Sabha ka ban long ha ka 19 tarik u Iaiong kaba iaid beit iaid ryntih bad kaba suk ba sain.

Haba pyntip ia kane ha ka sngi ba Ar ba la lah, u Superintendent of Police ka East Khasi Hills u Rituraj Ravi u la ong, “Ka sorkar Jylla ka la pan 11 pyrton ki bor pahara Central Reserve Police Force (CRPF) bad 7 pyrtong ki bor pahara ka State Armed Police Force (SAPF).” U la ong ruh ba lai pyrton ki bor pahara la dep don lypa ha ka Jylla.

Nalor kata u SP u la ong ruh ba ka Tnat pulit ka la dep ruh ban thaw ia ka flying squad team (FSTs) bad ka kynhun Static Surveillance Teams (SSTs) katkum ka jingbthah da ka Election Commission of India (ECI), bad baroh kine ki ar kynhun ki la dep don lypa ha ka kam ba la bynshet ha ki.

Shuh shuh u la ong ba ki bor pulit ki la shim ia baroh ki sienjam ban pynthikna ban pynneh ia ka shongsuk shongsain, bad u buh ruh ka jingkyrpad ia ki paidbah ba kin mih shakhmat ban pyndep ia ki hok thep vote jong ki khlem kano kano ka jingtieng jingsyier ha kane ka ilekshon Lok Sabha ka ban wan.