Haduh 19 post thylli ha DCIC Jowai ym don nonghikai iaka kam misteri bad machinist, ong ka KSU

Syllad | The Rising MeghalayaMarch 22, 2025

Ka Khasi Students’ Union (KSU), Jowai Unit hadien ba kala ioh iaka jubab RTI kala lap ba ki don haduh 19 tylli ki post kiba thylli kiba bym shym la thung hapoh ka tnad District Commerce and Industries Centre, West Jaintia Hills, District.

Ka KSU kala ong ba kane ka jingthylli kine ki post kala wanrah iaka jingdkhoh ai jingshakri kane ka tnad kaba iadei ban peit iaka kam sengkam sengjam ki samla ban ieng hala ki jong ki kjat.

Ka KSU kala ong ba shen kan sa pyntip ia kane sha ka bor district bad kumjuh sha ka District Selection Committee na ka bynta ban pyndap iaki post ba thylli khnang ba kane ka ophis kan lah ban pyntyllun iaki kam bad ban ai jingshakri sha u paidbah.

Shuh shuh haka 19 tarik Lber, ka KSU Jowai Unit haka jingialam u president Ewanmi Phawa, general secretary Nidapoi Shadap, Leonard Dhar bad ki dkhot ka Jowai unit la ioh ban ia kynduh ia u General Manager DCIC Bah B Warjri.

Ka KSU kala pyntip ba kane ka tnad la kham slem mynta kam shym la thung iaki nonghikai (trainers) haka kam mister bad machinist nalor kiwei kiwei kaba la wanrah jingduh myntoi iaki samla kiba kwah ban shah hikai.

Naka liang jong u general manager DCIC ula dep ban pyntip sha ki bor ba dei khmih ha kaba iadei bad ki kam ban thung iaki trainers khnang ban lah biang ban ai training iaka carpentry tang ba kane ka kam ka dang sahteng la ong u kyrwoh ka KSU.