Haduh 20-ton ki jaboh jabain ioh sei ki dkhot ka the Green-Tech Foundation na Wah Umkhrah

Syllad | The Rising MeghalayaMarch 25, 2024

Ki dkhot jong ka kynhun trei mon sngewbha ka Green-Tech Foundation ka la bteng ban shim ia ki sienjam ban pynneh pynsah ia ka jingkhuid jong ka mariang bad ki wah kiba don khamtam ha ki jaka sor da kaba mih shakhmat ban pynkhuid ia ka bynta jong ka Wah Umkhrah kaba hajan Weiking, Jaiaw ha 23 tarik mynta u bnai ha kaba ki la ioh ban sei haduh 20 ton ki jaboh jabain.

Ha kane ka jingpynkhuid la wan iasnohkti lang ruh da ka Seng Samla Mawlai bad kiwei pat.

U Chairman jong ka Seng u Bah H. Bansiewdor Nonglang u la ong, “Ngi la sdang pyrshang ia kane ka jingpynkhuid naduh ka 4 tarik mynta u bnai da kaba pynap da ki jingker kiba per halor um bad kiba khanglad ia ki jaboh ba ki tuid shuh shuh shapoh jong ka wah. Hadien la sei ia kine ki jaboh ha ka ha ka 9 tarik mynta u bnai bad kiba don ka jingkhia kaba haduh 7 ton.Katba ka jingioh sei i ki jaboh jabain ha kane ka sngi Saitjain ka long haduh 20 ton.”

U la ong ruh ba hadien kane ki dkhot jong ka Seng ki la pyniakhlad noh ia ki jaboh kiba dang lah ban pyndonkam biang ne recycle bad ki bym lah ban pyndonkam.

Nalor kata u la pynpaw ruh ba kane ka jingpynkhuid ia ka Wah Umkhrah ka dei tang ka jingpyrshang namar ka projek ban pynkhuid phar shisha ia kane ka wah kan shim por haduh kumba 6-7 snem na ka bynta ka Seng.

“Ka jingpynlut kaba donkam na ka bynta ban pynkhuid ia kane ka wah na ka bynta 4-5 snem kan ym duna ia ka 10-15 klur. Kumta kam dei ka kam kaba suk,” u la ong.Watla katta u la ong pat ba kane ka jingpyrshang jong ka Seng ban shim ia kane ka sienjam ban pynkhuid ia kane ka Wah Umkhrah ka la long kaba jop.

Ha kajuh ka por u buh ruh ka jingkyntu khamtam ia ki khynnah kiba dang khie dang san ban shim ia ki sienjam ban iashim bynta ha kaba pynkhuid ia kino kino ki jaka, ki khlaw ki btap lane ban pynkhuid ia ki um ki wah. U la bynrap ruh ba ka jingpynkhuid ia kane ka wah kan long ka jingkyrkhu kaba khraw ia ki nongshong shnong jong ka Damsite bad ka thain Mawdun.

Haba kyntu ia ka sorkar ba kan pyntreikam ia ki projek ban pynkhuid ia ki wah, u Chairman ka Seng u la ong, “Ka la dei ka por ban thaw ia ki committee kiba khlain, kata ym tang ka Shillong Municipal Board lane ka Forest Department ne ka Khasi Hills Autonomous District Council (KHADC).Ka dei ruh ban don ia ka committee ka ban don ia ki nodal officer ki ban khmih ia ki artylli ki wah, kata ka Umshyrpi bad Wah Umkhrah.”