Haduh 22 Nohprah hap ap ka ECC la yn khang ne plie iaki karkhana thang dewiong

Syllad | The Rising MeghalayaDecember 15, 2022

Namar ka jingbitar iaka jingleh bymsuidniew ka Sorkar Jylla ban pyntreikam iaka hukum ka National Green Tribunal (NGT) ban khang mardor iaki karkhana sain rnga dewiong (Coke Factory) beain ha Elaka Sutnga, East Jaintia Hills District, ka Environment Coordination Committee (ECC) kala iaid padibah jai jai (peace rally) ban pyrshah iaka jingkuman ka sorkar MDA ha ka sngi Palei.

Kane ka jingiaid paidbah ka ECC kaba la sdang na Shikilo, Lad Sutnga haduh ka phyllaw ka DC Ophis Khliehriat kala long kaba jop.

Ki nongshong shnong na kylleng ki shnong kiba hap hapoh ka Elaka Sutnga kila mih paidbah ryngkat ka jingpyrta ban pynrem iaka sorkar kaba leh kuman ban khang ia kine ki karkhana sain rnga dewiong beaiñ (Coke Factory) kiba la pynmih iaki lyer jakhlia kaba shyrkhei kaba la ktah iaka koit ka khiah u nongshong shnong.

Ki khubor haki placard ki ong “Ngi lah la ngiah la kdang ïaka jingleh mynthi ka sorkar u Conrad K Sangma, sangeh noh ïaka lyer jaboh, sangeh noh ka toh hoh ïa u kyndang kwah, sangeh noh ka jingrhah spah, sangeh noh ka ïuhbeiñ ïuhroit, ai ngin kjit bad ring mynsiem biang sa shisien ïaka ‘er batemon batesi kaba ka khyndew ka mariang ka ju pynmih ïaki jor tynrai, u longdien ula buh, wat ai ba ki long mynta kin bamduh.”

Ka Environment Coordination Committee (ECC) kala dawa ban khang ïaki 14 tylli ki karkhana Coke kiba dang treikam hapoh ka Elaka Sutnga.

“Ki trai Coke Factory kidei ki ingkhong shyllang mat jong ka ri bad ka jaitbynriew, kiba kdup mynder ri da kaba leh benami hynrei kim tip ba ki tdem coke kiba ki pynmih na ki karkhana jong ki, ka riam bad thap ïaki khun ki kti,” la pynpaw u paid nongshong shnong lyngba ki jingthoh placard.

Ka ECC kala thied iaka jingkhang ka NGT lyngba ka mukotduma kaba la mudui da u Pynbait Sutnga.

Ka NGT kala dep pynkut ia kane ka mukotduma haka 8 tarik Naitung 2022 bad bad kala bthah iaka sorkar MDA lyngba ka MSPCB ban dain kuna ia baroh 31 tylli ki karkhana sain rnga dewiong kiba pyntreikam khlem CTE haduh 5 klur tyngka.

Shuh shuh ka NGT kala bthah ruh iaka sorkar MDA ban shna iaka action plan pyrshah iaki karkhana kiba ioh CTO, hynrei haduh mynta ka sorkar kala sngap man man leh bymsuidniew iaka hukum ka NGT.

Hadien ka jingïaid paidbah kala don ka jingïalang lyngkot ba la pynïaid da u president ka ECC u Never Lamurong bad ki jingkren na ki Waheh shnong, kynthup u Waheh shnong ka Lelad u Enel Bareh, u Waheh shnong Nongsning u Lambha Dhar, u Waheh shnong Narwan u Lamsuk Langstang bad na u Legal Adviser u Reading War nalor kiwei.

Baroh ki Waheh shnong ki pynpaw ba ka jingdon ki karkhana thang dewïong ka wanrah ka jingjakhlia jong ka lyer bad ka jingsma kaba buh ïaki jingkoit jingkhiah ki nongshong shnong ka elaka haka jingma.

“Lada phim lah ban pynduh pyndam ïaki karkhana thang dewïong ne Coke Factory hapoh ka Elaka Sutnga, ka sorkar jong phi kan khyllem haki San snem ban wan bad hangta phin sa babe kylla”, la byrthen ka kawei ka longkmie ka Kong F. Kamar bad ka la bynrap “Ngi ïam, ngi sliang ngi thngan bad ngi shah thang ka met bad ring mynsiem daka er-bih hynrei phim patiaw ïa ngi”.

Ka East Jaintia kadei ka District kaba kyrshan pisa ïaka sorkar Jylla lyngba ki khajna na u dewïong bad kiwei kiwei ki mar poh khyndew hynrei ka nang tang ban kjit spah na ka khlem da ai kylliang pateng eiei, la ong u Waheh shnong Nongsning u Lambha Dhar.

U Reading War u nongaibuit ka ECC ula ong haka jingïakynduh jong u bad riew shemphang na kylleng ka ri kumjuh na bar ri ki ong ba lada pyntreikam tang 5 tylli ki karkhana hapoh ka Elaka ki briew kin nym im shuh, hynrei katno lei kan ktah lada pyntreikam haduh 14 tylli.

Ka ECC ka la aiti ruh ïaka dorkhat ha u Deputy Commissioner u Abhilash Baranwal ban dawa pyndam ïaki 14 tylli ki karkhana bad na ka liang u DC ula kyntu ïaki nongshong shnong ka Elaka ban ïaishah haduh ka 22 tarik une u bnai.