Haduh 25 snem shah rai set phatok u ba leh khlem akor ia ka khynnah

Syllad | The Rising MeghalayaApril 12, 2025

Ka Iingkashari MK Lyngdoh, Special Judge (POCSO), East Khasi Hills, Shillong ha ka 3 tarik Iaiong ka la rai pynrem ia uwei u runar uba kyrteng u Androsing Mawthoh da kaba set phatok haduh 25 snem kynthih hapoh ki kyndon ka POCSO Act namar ka jingdonkti ha kaba jrongkti bad leh khlem akor ia kawei ka khynnah rit.

U Superintendent of Police ka EKH, u Bah Vivek Syiem u pyntip haka 11 tarik Iaiong ba ka Iingkashari hadien ba ka la lap ba u Androdsing Mawthoh u donkti ha kane ka kam bymman ka la rai pynrem hapoh ki sawtylli ki kyndon, kata da kaba set phatok 20 snem ha ryngkat ka kuna kaba long T.30,000 ka jingpynshitom hapoh ki kyndon Section 4 jong ka POCSO Act bad ba un shah set tam sa saw bnai lada um lah ban siew ia kane ka kuna.

U la ong ruh ba une u runar u la shah rai pynrem ruh da kaba set phatok sa 25 snem ha ryngkat ka kuna T.50,000 hapoh ka kyndon Section 6 ka POCSO Act bad ba un shah set tam sa 6 bnai lada um lah ban siew ia kane ka kuna.

Une u runar u la shah rai pynrem ruh da kaba set phatok 3 snem kynthih ha ryngkat ka kuna T.10,000 hapoh ka kyndon Section 8 ka POCSO Act bad ba un shong tam ha phatok sa 2 bnai lada um lah ban siew.

Nalor kata u la shah rai pynrem ruh da kaba set phatok 7 snem ha ryngkat ka kuna kaba T.20,000 bad ba un hap shong tam sa 3 bnai lada um lah ban siew ia ka kuna hapoh ka kyndon Section 10 ka POCSO Act.

Kane ka jingjia shah lehbor ka dei kaba la register hapoh Madanrting police station ha kaba ia ka jingtohkit la pynlong da ka WP/SI K Kumari kaba la don mynta hapoh ka tnad CID ha Shillong.