Haduh 3.71 lak hiar ka jingioh vote ka VPP, kiew ka NPP da palat 2.80 lak: Sniawbhalang

Syllad | The Rising MeghalayaFebruary 25, 2025

U National General Secretary ka National People’s Party (NPP) bad Symbud Myntri Rangbah ka Jylla, u Bah Sniawbhalang Dhar haka 25 tarik Rymphang u la ong ba ka jingioh vote kyllum (vote share) jong ka liang pyrshah Voice of the People Party (VPP)  ka la hiar sha ka 3.71 lak, katba ka jingioh vote jong ka NPP ka la kiew sha ka 2.80 lak ha kane ka elekshon MDC ha Rilum Khasi bad Jaintia.

“Ka VPP ka la ioh tang 3.71 lak vote ha kane ka elekshon ADC na ka 5 lak vote kaba ka la ioh ha ka elekshon Lok Sabha 2024 na ki 36 tylli ki Assembly constituency ha Khasi bad Jaitnia kiba hap hapoh ka Shillong Parliamentary. Kane ka mut ba ka jingioh lum kyllum ka la hiar syndet tang hapoh ka 8-9 bnai bad hapoh u 2028 kan sa nanghiar arsut da 80 percent, phim lah ban tip, ngin trei shitom na ka bynta kata,” ong u Bah Sniawbhalang haba kren sha ki lad pathai khubor.

Hynrei, u la kam ba ka NPP ka la lah ban nangleh bha ha kane ka elekshon ADC kaba dang shu dep ha kaba ka jingioh vote ka la kiew sha ka 2.80 lak.

“Mynta ka kynti ka jingiapher ha ka jingioh vote hapdeng ka VPP ka long tang 85,000 haba ia nujor bad ka 3 lak vote kaba ka la ioh ha ka elekshon MP kaba dang shu dep,” ong u Dhar.

Ka NPP mynta kan thaw ia ka Executive Committee (EC) bathymmai ha Jaintia Hills Autonomous District Council (JHADC) da ka jingkyrshan kaba la kynjoh sha ka 18 ngut ki MDC, kaba kynthup ia 14 ngut na ka NPP, 3 ka UDP, 1 kyrtong khlem seng. Ka NPP ka la ioh tang 4 seat na ki 29 ki constituency ha Khasi Hills Autonomous DIstrict Council (KHADC) hadien ba ka VPP kala ioh haduh 17 seat.

“Nga ai khublei ia ki paidbah ka Rilum Jaintia halor ka jingshaniah kaba ka la ai bad kaba la pynlong ia ngi ba ngin dei ka party kaba jop bun eh ha JHADC. Ngi la lah ban leh kham bha shuh shuh da palat 50-60%. Ngi burom ruh ia ka rai jong u paidbah ka Rilum Khasi kaba ngi la ioh tang 4 seat,” ong u nongialam ka NPP.

Halor ka jingkynnoh u president ka VPP u Bah Ardent Basaiawmoit ba ka la don ka jingpyndonkam bor ha Jaintia Hills, u Dhar u la ong, hynrei ka jingjia kaba la jia ha ka shnong Narwan ka pyni ba dei ka VPP kaba la pyndonkam da ka bor ban thombor ia ka iing jong u Rangbah Shnong barim.

“Kam shym la don kano kano ka jingpyndonkam bor ha kane ka elekshon. Ki paidbah  ki la ioh ban pyndep ia ka hok thep vote jong ki da kaba laitluid. Tang namar ba ngi ioh 13 seat, kam mut ba ngi pyndonkam da ka bor. Ha ka jingshisha, dei ka VPP kaba la pyndonkam da ka bor da kaba leit pynjulor ia ka iing jong u Rangbah shnong ka Narwan ha ka sngi Nyngkong ba la dep,” u la ong.

“Kumta, phi la pyndonkam da ka bor ym ma ngi,” u la ong da kaba bynrap, “Tang namar ba ki la jop haduh 17 seat ha KHADC hato ngi ruh ngin kynnoh ba ki la pyndonkam da ka bor? Em, ngi burom ia ka rai jong u paidbah.Ngim shym la pynmih ia kino kino ki jingkynnoh pyndonkam bor pyrshah ia ki halor ka jingjop 17 seat ha Khasi Hills, bad tang namar ba ngi jop 13 seat na JHADC kin kynnoh ba ngi la pyndonkam da ka bor, kata ka long kaba bakla.”

“Ngi la lah ban lehbha kum ka MDA. Ngi la ioh 12 seat baroh ha KHADC bad 18 ha JHADC,” u la bynrap.

U la ong ruh ba ka MDA kam don satia ia ka jingthmu ban thaw ia ka EC kaba thymmai ha KHADC namar ki paidbah ki la ai ia ka rai kaba shai sha ka VPP bad ong, “Ki (VPP) ki la ioh ia ka jingbun paid kaba pura kumta ai ba kin thaw ia ka EC kaba thymmai.

Watla katta u la ai ksai da kaba ong, “Lada kim lah ban pyniaid shakhmat ia ki kam ngin sa peit hadien katto katne snem. Ngin sa ia peit.”

Haba pynpaw ba ka VPP ka la kular shibun kiei kiei ha kane ka elekshon, u Dhar u la ong, “Nga khmih lynti ba kin pynurlong ia ki jingkular khnang ba ki paidbah kin ioh ia ka jingkmen, hynrei lada kim lah, ki paidbah kin ym sngewtynnad.Kumta ki paidbah kin ai por ia ki lai snem.”

Haba kylli la ka NPP ka la iakren ne em ban iatreilang bad ka Congress ha JHADC, u Bah Sniawbhalang u la ong, “Ngin sa ia peit, ailad ia ngi ba ngin pyndep shwa ia ka bynta kaba nyngkong.” 

Nalor kata u la kular ruh ba ka EC kaba thymmai ba la ialam da ka NPP kan shimkhia ha kaba iadei bad ka jingkyrduh pisa ka JHADC bad ong, “Ai ba kin thaw shwa ia ka EC kaba thymmai katba ngi dang pyrshang ban shim ia ki sienjam kum ka sorkar. Ngi dang pyrshang ban shim ia ki lad ki lynti namar ka jingkyrduh pisa ka don beit ha ki District Council, kumta ngi la pyrshang borbah ba hadien habud kan ym don shuh ka jingeh.”