Haduh 300 klur ioh kurup drok na ka jylla ha kine ki ar snem ba la dep, shah kem 610 ngut: DGP
U Director General of Police (DGP) u Dr LR Bishnoi ha ka 5 tarik Lber, ula pyntip ba ka jingioh kurup drok hapoh ka jylla ha kine ki ar snem ba la dep ka la kot shaduh ka T.300 klur bad ki la don 610 ngut ki briew kiba donkti kiba la shah kem.
Na kane ia u drok uba shongdor T.75 klur la ioh kurup ha u snem 2022, T.170 klur ha u snem 2023 bad T. 21 Klur tang ha kine ki ar bnai jong u snem 2024, ong une u hehduh pulit.
Haduh 26 kilo u drok heroin la ioh ban kurup ha kine ki ar snem ba la dep. Kane ka kynthup ia 7.5 kilo u heroin ba la ioh kurup ha u snem 2022, 16.3 kilo ha u snem 2023 bad jan kumba 1 kilo u heroin la ioh ban kurup tang ha une u bnai Kyllalyngkot bad u Rymphang 2024.
Ka jingioh kurup ia u Kynja ne Marijuana ka long haduh 4,750 kilo ha u 2024 (kata ka jingioh kurup ba dang shen da ki bor pulit ka Ri Bhoi District), kata na ka 1400 kilo ba la ioh kurup ha u 2023 bad 3987 kilo ha u snem 2022.
Na ka liang u DGP u la leh burom ruh na ka bynta ki pulit ka Ri Bhoi halor kane ka jingioh kurup ia une u Kynja ba shi nombor ne first grade kaba la jia ha kane ka sngi U Blei ba la lah.
Ka jingioh kurup ia ki dawai kuli yaba tablets ka la nangkiew ha kaba haduh kumba 19000 tylli ki tablet la ioh ban kurup ha u snem 2022, 60,000 la ioh ban kurup ha u 2023 bad 2000 ki table mynta u 2024.Ka jingioh kurup ia kiwei pat ki jait dawai kuli pynbuaid ki kynthup ia 16928 tylli ha u snem 2022, 32,298 ha u 2023, bad 600 tylli mynta u 2024.
Ha kajuh ka por ha ka sien kaba nyngkong ki bor pulit ki la ioh ban kurup haduh 14.2 kilo u jingdih pynbuaid crystal meth uba shongdor haduh T.1.5 klur.
Baroh ki la don haduh 116 tylli ki case ba la registar hapoh ki kyndon NDPS ha u snem 2022 bad kane ka la kiew sha ka 189 ha u snem 2023 bad 13 tylli ki case la registar tang ha kine ki ar bnai ba la dep jong une u snem thymmai.
Ki la don haduh 610 ngut ki briew kiba la shah kem naduh u snem 2022 haduh u 2024.Na kine 234 ngut ki la shah kem ha u 2022, 355 ha u 2023 bad 25 ha une u 2024. 10 percent na kine kiba la shah kem ki dei ki nongkhaii drok kiba dei ki kynthei.
Da kaba pynpaw ba ka jingshyrkhei jong u drok ka dang dei kaba sngewkhia jur ha Meghalaya, u DGP u la ong, “Kane ka la wan long namar ka jingiajan bad ki jaka jong ki ri ba marjan ba la tip kum ka ‘golden triangle.” Kham hashwa ka dei tang ka jaka rung, hynrei mynta ka la kylla ka jaka pynpoi bad jaka khaii.”
U la ong ruh ba ka jingdon jong kiba pyndonkam drok ka la nangkiew bad kaba la wanrah ka jingsngewkhia kaba jur na ka bynta baroh.
“Ban iakhun pyrshah ia kane ka jingsniew, ki pulit ka Jylla ki la shim ia ki sienjam bapher bapher, kata kum ki jingpynshai paidbah khamtam hapdeng ki samla da kaba pynlong ia ki awareness programme hapoh ki jaka pule bad bteng ruh ban pynlong ia ki jingkhynra pyrshah ia ki kam khaii drok beain,” ong u Bishnoi.
Une u hehduh pulit u la ong ruh “Ngi la pyndonkam ia ki kor ki bor ban kem ia ki nongkhaii droks bad ka CID kala leh ia ka kamram ha kaban pyndonkam ia ki kor teknoloji ban lapksai ia ka jingiadei jong kine ki nongkhaii. Ngi la ia sam lang ia ki jingtip bad kiwei pat ki jylla khnang ba kan don ka jingiatreilang bad ba ngin lah ban tehlakam ia kane ka jingeh.
Nalor kata u la ong ba na ka liang u Mynti Rangbah ka Jylla ruh u don ia ka jingiohi jngai ban pynlong ia ka Meghalaya kaba lait na u drok bad kumta kin trei shitom da kaba pyndonkam ia ka social media Tweet.
Shuh shuh ha kine ki ar snem ba ladep haduh 28,000 tylli ki bilor dawai jyrhoh ha u snem 2022, 88000 tylli ha u 2023 bad 112 ha u 2024.Nalor kata la ioh ruh ban kurup ia ka pisa T.36 lak ha u 2022, T.45.6 lak ha u 2023 bad T.60,000 ha u 2024.Baroh ki kali ba la ioh kurup ha u 2022 ki long 67 tylli ha u 2023 157 tylli bad 12 tylli mynta u 2024.
Facebook
Instagram
Youtube
Twitter
Leave a Reply