Haduh 36,000 tylli ki jingpan jingiarap la ioh pdiang lyngba ka SOS call halor ka jingshah thombor ki kynthei

Syllad | The Rising MeghalayaNovember 29, 2023

Ka Women Helpline 181 ka la ioh pdiang haduh  palat 36,000 tylli ki jingpan ia ki lad jingiada bad jingiarap lyngba ka SOS call halor ki jingjia shah thombor ba bun rukom hapdeng ki kynthei hapoh ka jylla Meghalaya.

“Haduh mynta ngi la ioh pdiang haduh 36,362 ki SOS call ban pan jingiarap ha kaba 477 tylli la dep ban rejistar, 158 tylli ki dang iaid shakhmat bad 304 tylli kiba la lah ban pynkut noh,” ong u Myntri ka Tnat Social Welfare u Bah Paul Lyngdoh haba kren sha ki lad pathai khubor hynne ka sngi ba Ar.

“Ka jingmih shakhmat ban ai jingpyntip kam da duna eh, kata da kaba shim kyllum ha kane ka  Jylla kaba ngi kham ialeh ban buhrieh ia kiei kiei bad bym kwah ban pynpaw pyrthei shabar jong ka iing.Kane ka jingdon jong haduh 36,000 tylli ki call ki dei kiba la wan long naduh ba buh ia ka Helpline bad kaba pynpaw ruh ia ka  jingmih shakhmat jong ki kynthei ban pyntip ia ki kam shah  thombor kala kiew shibun” ong u Myntri.

Nalor kata na ka liang u Myntri u pyntip ruh ba na ka liang ka sorkar ka la shim ia ka rai ban pyntreikam lang ia u helpline 181 bad u child helpline 1098 khnang ban pynthikna ia ka jingai jingshakri kaba pura ha kaba iadei bad ka jingioh pdiang ia kiba kum kine ki jingpang jingiarap hapdeng ki kynthei khynnah.

Ha kaba iadei bad ki bynta jong ki Dorbar Shnong, na ka liang u Myntri u la ong, ” Ngi la shim ia ki Dorbar kum ki bynta jong ka Tnat Social Welfare, bad ruh ki don ruh ki call kiba la wan lyngba ka jingai jingkyrshan jong ki dorbar shnong hi.”