Haduh 40 kynta shim por ban pynlip ia ka ding kaba klang ha Khyndailad; leit jurip u CM

Syllad | The Rising MeghalayaOctober 16, 2023

Ka la shim por haduh kumba 40 kynta ia ki kynhun pynlip ding ba kin lah ban pynlip duh ia ka ding kaba klang na ka jingpluh jong ka iing kaba la jia ha Thana Road, Khyndailad, Shillong ha ka sngi Saitjain ba la lah.

Na ka liang u Myntri Rangbah ka jylla u Conrad K Sangma ha sngi Nyngkong, u la pynlong ka jingleit jurip ia kane ka iing kaba la shah bamduh na ka jingpluh ding kaba triem kaba dei jong u Amit Singhania.

Kane ka iing saw mala kaba don shibun ki jaka buh tiar bad kaba kynthup ruh ia ka iingsah jong ki Singhania ka la shah pynjulor phom ha kane ka jingjia kaba la jia ha ka por kumba 1:20 nohphai sngi jong ka sngi Saitjain ba la lah.

U CM Conrad Sangma u la bishar bniah halor kane ka jinglong jingman baroh ha ryngkat u Chief Secretary, u DGP bad kiwei pat ki heh sorkar.

Lah ban kdew ba kane ka jingpluh ding kaba la jia ha katei ka sngi ka la thaw rekod ha kaba iadei bad ka jingshim por ban lah ban pynlip duh ia ka.

Ia kiba sah bad ki jingjulor la lah ban sakhi katba u CM bad kiwei pat ki heh sorkar ki dang leit ban jurip ia kane ka jingjia kaba la shim ruh ia ka jingim jong uwei u nongtrei uba kyrteng u Sampath Singh Jangir uba trei kum u manager hapoh Bhajanlal.