Haduh 4417 ngut ki nongtrei bar jylla kiba trei ha ki kharkhana dewbilat ha East Jaintia Hills

Syllad | The Rising MeghalayaNovember 8, 2024

Ki don haduh 4417 ngut ki bar jylla kiba trei kiba ktah kum ki nongbylla ha ki khyndai (09) tylli ki karkhana shna cement kiba ha East Jaintia Hills District.

U Ma Shiwat u la iathuh ba ki don haduh 4417 ngut ki nongtrei bar jylla na baroh ki karkhana shna cement ha East Jaintia Hills District kiba la shim ia ka non tribal employees service licenses na ka JHADC naduh ka 1 tarik u bnai Iaiong 2023 haduh 30 tarik bnai Nailur 2024.

Kane ka jingkhein jong ka jingdon ki nongtrei bar jylla ka la mih pyrthei ha ka jubab bala ai da u Chief Executive Member jong ka JHADC u Ma Thombor Shiwat haba jubab ia ka jingkylli bala wanrah da u MDC ba shimet jong ka Jowai North u Ma Brightstar Chyrmang ha ka Dorbar Tlang jong ka JHADC haka 7 tarik Naiwieng.

Haba jubab pat ia ka jingkylli bala wanrah da u MDC jong ka Jowai Central u Ma Andrew Shullai, u Shiwat u la iathuh ka Council ka la ai NOC tang ia ka Meghatop Cement Company, Wahiajer, Narpuh, East Jaintia Hills District naduh ka 1 tarik u bnai Risaw 2023 haduh 30 tarik u bnai Nailur 2024.

Katba u Executive Member jong ka JHADC u Ma Eveningstar Teron u la iathuh ba ka Council ka la ioh 54, 24, 606 tyngka kum ka khajna na ki iew ki hat hapoh ka Council naduh u ka 1 tarik Iaiong 2023 haduh 30 tarik u bnai Nailur snem 2024.