Haduh 50 mn dollar pynkhreh ka sorkar ban pynlut ban tei bad kyntiew kyrdan ia ki Anganwadi Centre ha ka jylla

Syllad | The Rising MeghalayaNovember 29, 2023

Ka Sorkar Meghalaya kala pynkhreh ban pynlut haduh 50 million dollar na ka bynta ban tei ia 273 bad ban kyntiew kyrdan ia palat 2200 tylli ki Anganwadi Centre hapoh ka Jylla, ong u Myntri ka Tnat Social Welfare ka jylla u Bah Paul Lyngdoh haka sngi ba Ar hadien ka jingialang bishar kam ba ar sngi kynthih.

Haba kren sha ki lad pathai khubor, u Bah Paul u la ong ba kawei na ki jingduna jong ka tnat ka long haduh ka jingbym don ia ki riew shemphang ban pynkhreh ia ka detailed project reports (DPRs) bad ruh ban pynkhreh ia ka utilization certificates (UCs) ha ka por kaba biang.

“Kumta ruh, ka don ka jingsngew donkam ban thung ia ki riew shemphang kiba lah ban iamir jingmut bad ki tnat treikam ha Delhi khnang ban lah ban pynkloi ia ki skhim bapher bapher kiba la sahkut namar ka jingbym lah ban pyndep biang por ia ki jingdonkam,” ong u Myntri.

Katba na ka liang u Principal Secretary ka Social Welfare u Sampath Kumar ula ong ba kane ka la wan long namar na ka liang ka Tnat ka hap ai ia ka kaiphot sha ki san tylli ki Ministry ka Sorkar India kaba kynthup ia ka Ministry of Women and Child Development, Ministry of Social Justice, Ministry of Tribal Affairs, Ministry of Minority Affairs bad ruh hateng hateng sha ka Tnat DoNER.

“Ngi don ia ka Directorate kaba rit, bad kumta dei na kata  ka daw donkam ban pynkhlain noh ia ka Directorate. Ka Directorate kan sa ioh noh ia ki jingkyrshan jong ki riew shemphang khnang ba kin lah bha ban iakren ia pynbeit kam bad ki Ministry” ula ong.U Kumar u pyntip ruh ba ka Sorkar kala rai ban shna bad ruh ban kyntiew kyrdan ia ki Anganwadi Centre kiba mynta ki kdup ia palat 6 lak ngut ki khynnah.

U la ong ruh; “Ngi la pynkhreh ia ka mang tyngka kaba 50 million dollar ban kyntiew kyrdan bad tei ia kine ki Anganwadi Centre” kata da kaba bynrap ruh da kaba ong, ngi la dep iasoi ia ka soskular shim ram haba buh hakhmat ia kine ki kam bad kane ka long lyngba ka ADB Project nalor ki song pisa ba ngi ioh lyngba ka MGNREGS”.

Shuh shuh u la ong ba ka Tnat ryngkat ka jingiatreilang bad ka Tnad C&RD ki la  pynlong ia ka jingjurip ia baroh ki Anganwadi Centre hapoh ka Jylla bad da kaba  pynshong nongrim ia kane, la lap ba 273 tylli ki Centre ki dei ia kaban pynduh noh bad ban tei thymmai da kiwei pat, katba palat 2290 tylli ki centre ki dei kiba  donkam ba kyntiew kyrdan noh.

Ha ka juh ka por u la pyntip ba la bthah ruh ia ki Deputy Commissioner ba kin wanrah ia ki jingtyrwa na ka bynta ban tei ia ki Aganwadi Centre kiba thymmai ha palat 1500 tylli ki Shnong ki bym pat shah kynthup lang.