Haduh 90 ngut ki Pulit ka thain NE ki la pyndep ia ki jingshah hikai pyntbit ha NEPA

Syllad | The Rising MeghalayaNovember 30, 2024

Haduh 90 ngut ki pulit ophisar na ka thain Shatei Lammihngi kaba kynthup ia 27 ngut ki Deputy Superintendents of Police (Probationary), 2 Inspector, 56 Sub-Inspectors (Cadet), bad 5 ngut ki Assistant Sub-Inspectors (Cadet) ha ka 29 tarik Naiwieng kila pyndep ia ka jingshah hikai pyntbit hapoh North Eastern Police Academy (NEPA), Ri Bhoi District.

Napdeng kine ki 90 ngut  ngut kiba la pyndep ia ka jingshah hikai 46 ngut ki dei na Meghalaya, 19 ngut na Manipur, 14 ngut na Assam bad 11 ngut na Nagaland.

Ha kane ka sngi leh burom la ia don lang ruh u Myntri Rangbah ka jylla u Conrad K Sangma uba la iashim bynta ha ka Passing Out Parade hadien ba ki la pyndep ia ka jingshah hikai jong ka ‘53rd Batch of Basic Course.’

Haba aijingkren kum u kongsan ha kane ka sngi u Myntri Rangbah u la pynpaw ka jingsngewkmen ban iohi ba kitei ki 90 ngut ki pulit ophisar kila lah ban pyndep ia ka jingshah hikai kumba 1 snem lynter bad ai ruh ka jingiaroh ia ka NEPA kaba dei kawei na ki jaka ai jinghikai kaba pawkhmat kaba la lah ban pynmih haduh kumba 36 hajar ngut ki pulit ha ki 46 snem ka jingïaid lynti.

U la ong ruh, “Hapdeng kane ka jingshah hikai pyntbit kaba bun bun bnai phi la hap ban ïaid lyngba shibun ki jingeh bapher bapher, ki jinglong jingman ba ka Academy ka la buh ïa phi lyngba ki jingtynjuh bapher bapher hynrei kaba nga lah ban ong ka long ba ha kaba kut jong ka sngi ka don ka ka daw balei ba la buh ïa kine ki jingtynjuh haphi bad ka don ka daw balei ba phi shim ïa ka jingsmai mynta ka sngi.”

Nalor kata u la kyntu ruh ia kine ki pulit kiba la pyndep ia ki jinghikai ba kin long kiba sngewrit haba ki leit ban shakri ha ka kam namar ha ka jingïaid lynti kin sa iakynduh ia shibun ki jingeh bad ki jingtynjuh hynrei ka jingskhem ka jingmut bad ka jinglen lade haka kam shisien ka sngi kan sa pyrto ia ki.

La sakhi ruh ha kane ka sngi da ka jingiadon lang u Dr Celestine Lyngdoh MLA ka Umsning, u Danesh Rana Director ka NEPA uba la shim ruh ïa ka bynta ban pynsmai ïa kitei ki 90 ngut ki pulit ophisar shwa ba kin leit ban ai jingshakri sha ki paidbah, ki heh pulit ophisar na ka jylla, ki kmie ki kpa bad ki bahaiing hasem jong kitei ki pulit bala pyndep ia ki jingshah hikai bad kiwei kiwei.