Haduh palat 500 tylli ki skul ha ka Jylla ki bym pat shah kynthup ha ka UDISE

Syllad | The Rising MeghalayaFebruary 15, 2025

Ki don haduh palat 500 tylli ki skul ha Meghalaya ki bym pat shym la shah kynthup satia ha ka Unified District Information System for Education (UDISE) jong ka Sorkar.

Ia kane la pyntip da u Project Director ka SSA u Swapnil Tembe hadien ka jingialang bishar kam jong ka tnad Pule Puthi.

U Tembe u la ong ba kine ki 500 tylli ki skul kim don satia ha ka Unified District Information System for Education (UDISE) kaba dei ka kyndon jong ka Sorkar Pdeng na ka bynta ban ithuh ia kawei pa kawei ka skul hapoh ka ri.

U la ong ruh ba ka jingithuh ka mut ba ki skul ki donkam ban ioh ia ki katto katne ki kot ki sla na ki bor sorkar hashwa ba kin treikam.

“Ki don ki kot ki sla ia kiba la ai da ki bor sorkar kum ka nuksa ia ki elementary school ki DSCOs ki dei ban ai ia ka jingithuh. Ka lah ban dei ka jingai jingbit na ka bynta ban plie, ka lah ban dei na ka bynta ka jingithuh ba shipor, ka lah ban dei ka jingithuh kaba neh, hynrei ka long kaba sngew bynniaw ha ki rukom treikam kiba la iaid la slem bah kine ki skul ki la treikam khlem da ioh ia ki jingithuh,” ong u Tembe.

U Tembe u la ong ba na ka liang ka Sorkar India ka la bthah ia baroh ki sorkar Jylla ba kin shimkhia ia kine ki skul ki bym pat shym la ioh ia ka jingithuh.

“Kumta ruh ngi la kyntu ia kine ki skul ba kin leit ban pynshisha la ki don ne em ia baroh ki jingdonkam khnang ba kin ioh ia ka jingithuh, ” u la bynrap.

Nalor kata u la bynrap ba ka Tnad Pule Puthi kan sa pynmih shen ia ka rukom treikam kaba la pynkhreh ryntih na ka bynta baroh ki nongshim bynta ba kin bud ryntih hashwa ban plie ia kano kano ka skul ha ka jylla.

“Lada don kiba kwah ban sdang ia ka skul ki dei ban pan jingbit, ki donkam ban pyni ba ki don ia ki jingtei bad hadien yn sa ai ia ka jingbit ban plie, bad hadien ki lah ban sdang hadien lai snem lada ki lah ban leh bha, lada ka don ka jingpynrung kyrteng  na ka bynta ki khynnah skul kumta ruh yn sa ai ia ka jingithuh kaba neh ne ka certificate ka jingithuh ha kaba yn ai ia u UDISE code,” u la bynrap.