Haduh T. 10,440 klur mang ka Sorkar Pdeng na ka bynta ki projek pyniaid rel ha ka thain Shatei Lammihngi

Syllad | The Rising MeghalayaFebruary 3, 2025

U Myntri ka Tnad Railway ka Sorkar Pdeng u Ashwini Vaishnaw ha ka 3 tarik Rymphang u la iamir jingmut bad ki lad pathai khubor na ka thain Shatei Lammihngi (Northeast) lyngba ka online halor ki project pyniaid rel kiba la kdew ha ka Mang tyngka jong ka Sorkar Pdeng na ka bynta u snem 2025-26.

Ha kane ka jingialang u Myntri u la pynbna ia ka jingmang pisa kaba kot haduh T.10,440 klur na ka bynta na ka bynta ban kyntiew ia ki projek pyniaid rel ha ka thain Shatei Lammihngi kaba pyni ruh ia ka jingkiew kaba heh tam ha ka jingmang pisa na ka bynta kane ka thain.

U Vaishnaw u la pynpaw ba ka Indian Railway kan bteng ban pyniar ia ka leit ka wan lyngba ki rel kiba sted, kiba shngain bad kham pynaram ha ka leit ka wan ha kylleng ka ri da ka jingmang pisa kaba kot T.2.65 lak klur ha ka snem kaba ar kynthih.

Ka Tnad Railway ka thmu ruh ban pyntreikam thymmai ia ki 200 tylli ki rel Vande Bharat, 100 tylli ki rel Amrit Bharat bad 50 tylli ki rel Namo Bharat ki ban pyndap pynbiang khamtam ia ki jingdonkam jong ki nongshong shnong kiba duna ha ka ioh ka kot bad kiba kham pdeng. Nalor kata la pynkhreh ruh ban tei ia 1000 tylli ki lynti suin (flyover) bad ki lynti pohkhyndew bad ban khmih shuh shuh ia ka jingshngain ha ka leit ka wan lyngba ki rel ha ka ri baroh kawei.

Ha ka jingkren, u Myntri u la pdiang halor ka jingiaid shaphrang ki projek lynti rel ha ka thain Shatei Lammihngi wat hapdeng ka jingiakynduh jingeh namar ka jinglong jingman jong ki jaka.

U Vaishnaw u la kdew ba naduh u snem 2014, haduh 1814 kilomitar ki lynti rel bathymmai la dep ban shna bad kaba la tam palat ia ki lynti rel jong ka ri Sri Lanka baroh kawei. Nalor kata la shna haduh 478 tylli ki lynti suin bad ki lynti pohkhyndew ha kylleng ki jylla ka thain Shatei Lammihngi. Kumjuh ka jingpyntrei ia ki lad jingiada jong ka Kavach ha ki lynti rel ba 1189 km ka la iaid shakhmat.

Ki General Manager jong ka Northeast Frontier Railway (NFR), u Chetan Kumar Shrivastava bad u Arun Kumar Choudhary, kiba la ia don lang ha kane ka jingialang online ki pyntip ba yn sa pynthymmai ia ki 92 tylli ki station ha kane ka thain hapoh jong ka Amrit Bharat Station Scheme. Ka jingpynpoi bording sha baroh ki lynti kiba hap hapoh ka jingkhmih jong ka NFR la khmih lynti ba yn lah ban pyndep ha u bnai Nohprah 2025, bad ia ka projek Bhairabi-Sairang ha Mizoram la buh ban pyndep ha u bnai Naitung 2025.

Kane ka jingmang pisa kaba T.10,440 klur na ka bynta ki projek pyniaid rel ha ka thain Shatei Lammihngi ka long palat san shah ban ia ka jingmang kaba pdeng kaba long T.2,122 klur ha u snem 2009-2014. Kane ka jingpynkiew ka bym pat ju jia mynno mynno ruh kan kyrshan ia ki projek kiba kongsan, kynthup ia ki lain thymmai, jingpynthymmai ia ki lynti rel, jingpynbit pynbiang ia ki lad pyniaid kali, jingshngain ki surok, jingtei ia ki jingkieng, jingkyntiew ia ki singal bad ka jingpynbha ia ki jingdonkam ba iadei bad ki nongthied nongpet.