Haduh T. 1,30,000 shah thok pisa ka longkmie ha u briew ba kular ai kam

Syllad | The Rising MeghalayaNovember 20, 2023

Ka kam sorkar lah ban ong ba ka dei ka thong jong manla kawei pa kawei ka longïing, khamtam kiba kham duna ha ka ïoh ka kot ki bym kot bor ban seng ïa ki kam lajong bad dei tang kane ka lad ba ki ïohi kaba lah ban pynlait ïa ki na ka jingduk kaba ban ïa ka longïing longsem bad dei ha kaba kum kane ka bynta ruh ba ki runar bad ki riewthok riewshukor ki shim kabu bha ban pynbiej ïa ka jinglong lui lui bad shisur jong kiba kum kine ki longïing bad kane ka jingshah thok pisa kiba bun ki longïing ha ki riewthok kiba kular ban ai kam sorkar kam dei shuh kaba dang thymmai hynrei kaba la ju jia na ka por sha ka por.

Hynrei watla hapdeng kiba bun kum kine ki jingjia ki dang don bun hi ki longïing kiba ngop ha kum kine ki jingshah pynbiej. Ha kawei na kiba kum kine ki jingjia, kawei ka longkmie ka la shim da ka ram haduh T. 1,30,000 ban ai ïa uwei u riew thok uba kam ïalade ba u dei u shipai bad ruh uba kular ban ai kam pynkhuid ïa ka bad ai kam sorkar ïa ka khun jong ka. Ïa kane la ïathuh da ka khun kaba la leit ban pan jingiarap na u Bah Lamdame Shangpliang.

Kane ka samla bad ka kmie jong ka, ki dei kiba shong ba sah ha Mynthlu, East Jaintia Hills District bad la ïakynduh ïa une u briew uba kular ban ai kam lyngba ka Facebook da ka kmie jong kane ka samla bad une u briew katkum ka jingïathuh kane ka samla u dei uba la tip kyrteng kum u Dakermi Shadap uba shong ba sah ha ka thain Ri Bhoi. Kane ka jingïakynduh jong ka kmie jong kane ka samla ka la nang wanrah ka jingsngewskhem bad jingshaniah ïa une u briew ka dei hadien ba u la wan kai wat shaduh sha ïing sah jong ki bad ha kane ka jingwankai ka la nang wanrah ïa ka jingïasngewjan bad shaniah bha na ka liang ka kmie bad kane ka samla ruh.

Hapdeng ka jingbym don kam don kam kane ka samla, une u briew u la kular ban ai kam ïa ka bad ïa ka kmie jong ka bad pan ruh ka pisa kaba T. 1,30,000 khnang ba un lah ban ai kam sorkar ïa kine ki shi kmie shi khun. Kane ka la pynlong ia ka kmie jong kane ka samla ba kan shim syndon da ka ram ban ai sha une u briew khnang ba kin ïoh ïa ka kam. Hynrei hadien ba la ïoh ïa kane ka pisa, une u briew u la jah kumba lai bnai eiei bad hadien kane u la wan mih biang bad ban pan pisa kylliang na ka kmie jong kane ka samla ban shna ïa ka kali jong u kaba la aksiden.

Da ka jingbym smgew shaniah shuh ka kmie jong kane ka samla ka la kyntait ban ai bad dawa ba u dei ban pynurlong shwa ïa kaei kaba u la kular nyngkong, kata ban ai kam  ïa ka bad ïa ka khun jong ka, hynrei hadien kane ka jingkyntait ka kmie jong kane ka samla, une u briew u la jah syndon khlem wan mih shuh bad watla na ka liang ka kmie jong kane ka samla ka la pyrshang ban phone hynrei ym ïoh shuh bad ka Facebook Account kaba u ju pyndonkam ruh u khlem pyndonkam shuh.

Na ka liang kane ka samla ka la pynpaw ka jingsngewsih kaba jur halor kane ka jingshah thok bad kaei kaba kham pynsngewsih bad sngewkhia ka dei namar ba kane ka pisa ruh ka dei kaba ki shu shim da ka ram hapdeng ka jingkyrmen ba ka jingeh kan kut noh bad ba kin ïoh ïa ka kam sorkar.

Na ka liang kane ka samla kala ai por ruh shi taiew ba une u briew un wan pynphai ïa kane ka pisa bad ki kot ki sla kiba u la shim bad lada um lah ban pynphai hapoh kane ka shi taiew kin leit ban ujor da ka ejahar sha ki pulit. Na ka liang u Bah Lamdame u la kyntu ïa une u briew ba un wan siew noh ïa ka pisa hapoh shi taiew bad u la kyntu ruh ïa ki paidbah la ki ïohi ïa une u briew ba kin bat bad pyntip sha u bad une u la kyntu ruh ba kane kan long kum ka jingsneng ïa kiwei pat ki khun samla bad ki paidbah ba kim dei ban ngop ha kum kine ki jingshah pynbiej bad ban long kiba husiar.