Haduh T.538.44 klur mang ka Sorkar Jylla ban pyntrei ia ka New Shillong Water Supply Scheme

Syllad | The Rising MeghalayaAugust 27, 2024

Ka sorkar Jylla ka la mang haduh T. 538.44 klur hapoh jong ka State Plan na ka bynta ban pyntreikam ia ka New Shillong Water Supply Scheme Phase-I. 

Ia kane ka project la ioh jingmynjur na ka sorkar ha ka 15 tarik u Lber ba la dep. Ia ka EPC contract la ai sha ka M/s BAC Infratech Private Limited ha u bnai Jylliew mynta u snem bad ka jingpyntreikam ia kane ka project ka dang don ha ka jingsdang.

Hynrei, na ka liang ka sorkar kan dang mang pisa ia ka New Shillong Water Supply Scheme Phase-II, ia kaba la tyrwa ban pynlut haduh T.1,111.56 klur.

Ia kane la pyntip da u Myntri ka tnad Public Health Engineering (PHE) u Marcuise N Marak haba jubab ia ka call attention motion ba la wanrah da u MLA ka VPP na Mawryngkneng u Bah Heaving Stone Karpran hapoh ka iingdorbar thaw ain haka 27 tarik Nailar.

U Myntri u la ong ba ka phase -I jong ka project ka kynthup halor ka jingpyntrei ia ki jingtei ba kongsan kum ka dam, 2 tylli ki jack well bad ka pump house halor jong ka pung bad kiwei ki tiar ba donkam, ka jingpyntrei ia ka stage I bad II pumping station, power station, ka jingtei ia ka water treatment plant, clear water sump bad kiwei pat pat ki jingpyntrei.

Ha kaba iadei bad ka jingdawa ban ai pyntrei sha ki kontraktor na ka jylla, u Myntri u la ong khnang ban pynthikna halor ka jingbit jingbiang bad ka jinglah ha ka jingpyntreikam katkum ka juk ia kane ka project baroh kawei, ia baroh ki jingdonkam na ka bynta ka phasi I jong kane ka project yn pyndait da ka SCADA (Supervisory Control and Data Acquisition)/IoT (Internet of Things) system.

Kumjuh u Myntri u pyntip ruh ba ka phasi-II jong kane ka project kan dang ioh pdiang ia ka mang tyngka. Ka phase-II kan kynthup ia ka jingbuh ia ka clear water pumping main, clear water gravity main, ka jingtei ia ka clear wter reservoirs bad ka jingpynbit pynbiang ia ki distribution system nalor kiwei pat.