Haka kylla kaba Ar kular ka Sorkar kan phaikhmat ban pynbeit ia u pud ka Block-1

Syllad | The Rising MeghalayaMarch 8, 2022

U Myntri Rangbah ka jylla u Conrad k Sangma, u la kular hapoh ka iing dorbar ba haka kylla kaba ar, ka sorkar kan sa shim iaka sienjam ba kan phai khmat naka bynta ban pynbeit noh pat ia u pud u sam ha ki jaka kiba hap hapoh ka Block-1, ba kynthup lang sa ia ki hynriew tylli kiwei pat ki jaka.

“Kat kum ka jingthrang bad angnud ki paid nong shong shnong jong ka Block-1 ba kin iai neh bad don hapoh ka Meghalaya, ka sorkar kan shim da ka juh ka sienjam jong ka jingiakren ha ka khep kaba ar bad ban bynrap lang ruh ia ki hynriew tylli kiwei pat ki jaka ba don ka jingiakajia bad ka Assam” la pynpaw u Conrad haba jubab ia ka call attention ba wanrah da u MLA ka Mookaiaw u Nujorki Sungoh hapoh ka iing dorbart mynta ka sngi.

Haba iadei bad ki kam pynroi ha kum kine ki jaka, ha kiba bun ki khep ka juh don lang ka jingiakren bad ia pynbeit hadpeng ki Deputy Commissioners/ Superintendents of Police lyngba ka jingialang jong ka Border Coordination Committee Meeting, kaba juh iai pynlong na kawei ka por sha kawei hadpeng ki DC bad SP na Assam.

Ban pynshisha ia kane, u Conrad u la pyntip hapoh ka iing ba u Deputy Commissioner, West Jaintia Hills District u la dep ban iashem bad ia kynduh bad u Deputy Commissioner, West Karbi Anglong District haka 6 tarik Nailar u snem 2021, ha kaba baroh arliang ki la shim ia ka rai ban pynneh beit ia ka jingiaburom ba mar kylliang ha ki jaka ba la leit ban rah ne ai ia ki kam pynroi.

Halor ka shongsuk ka shongsain, ki arliang kin hap ba kin shim khia ban khmih ba ka shong suk ka shongsain kadei beit ba kan ioh ban synshar bad lada jia ba donkam ban ai ia kino kino ki kam pynroi donkam ban da ia pyntip mar kylliang, la iathuh u Conrad.

Halor ka jingshah khanglad ka Meghalaya da ka Assam haba iadei bad ki kam pynroi, na ka liang u Conrad u iathuh ba Chief Secretary kala  dep ban phah da ka jingthoh sha u CS ka Assam ba un shim khia bad tuklar ia kane ka kam, da kaba u dei ruh ban bthah ia la ki jong ki ophisar ki jong u ba kim dei ban pyndik ne khanglad ia ki kam pynroi ba thmu da ka sorkar Meghalaya ha kum kine ki jaka.

Shuh shuh u Conrad u la iathuh ba khnang ban wanrah ia katta ka shong suk ka shong sain ki paid ha kum kine ki jaka, ki pulit ka Meghalaya na ka por sha ka por ki  pynlong ia ka jingiaid pahara kampher lada dei da ka kali ne da ka kjat khamtam lei lei ha ki jaka kaba kham mih bha ka jingiakajia ia u pud u sam, bad lada jia ba mih ne don kano kano ka huri hura, ki magistrate bad ki pulit, mar mar ki poi beit sha kum kine ki jaka bad tehlakam bad ruh ban pynneh ia ka suk ka sain.

Shwa ia kane, na ka liang u ma Nujorki, u pynpaw ba ki 71 tylli ki snem jong ka jingpait mynsiem bad dohnud jong ki paidbah ba shong ba sah ha ki bynta ka Block-1 ki thrang bad sliang ba kane ka jaka kaba ki don mynta shisien ka sngi kan dei beit noh kaba hap pura  hapoh u pud u sam jong ka Meghalaya.

“Naduh ka 13 tarik u Iaiong 1951, ki paidbah ba im bad ba shong ba sah ha kane ka thain ki la im shisha ka jingim ba kordit khamtam ban shah pyndik pynshitom ha ki bor synshar jong ka sorkar  Assam bad kumjuh ha ka kynhun jong ki seng kieng atiar, kiba na ka por sha ka por, ki juh wan pyndik ha ka dur jong ka jingdawa pisa jubor, ki khynnah kynthei ki shah ban bein ne thombor, don ruh ba la shu kem khlem kano kano ki daw, la pynbor ia ki ban siew ia ki khajna la ia ka khyndew ka shyiap ka iing ka sem bad ka iing sem ne ki jingri, ka jingban bein ia ki paidbah ka iai bteng da kaba pynduh ia ka umbam ka umdih ka koit ka khiah, ka pule puthi, ka lynti syngkien bad bording” la pynpaw u ma Nujorki.

Halor kine kiei kiei baroh, u ma Nujorki kum u MLA u kyntu ia ka sorkar ba ka donkam ba kan iaid shkhmat ia kane ka kam katba kloi khnang ban lah ban pynioh laitluid ia ki padbah na kane ka jingeh kaba ki la mad ha ki 71 tylli snem.