Haka sien kaba nyngkong eh paw ka Jawaharlal Nehru Memorial SS haka matrik, jah kyrteng ki skul pawkhmat ha Rilum Jaiñtia

Syllad | The Rising MeghalayaMay 27, 2019

JOWAI: Haka sien kaba nyngkong eh ka skul Jawaharlal Nehru Memorial Secondary School, Lamin kala rung haka kyrdan First Twenty haka resol matrik kaba la pynbna ka MBOSE haka sngi Nyngkong.

Kane kala wan hadien ba u Dimarkithmu Gayang uba la ïoh marks 561 (M, S&T, SSC, HPE, Kh) ula wan haka kyrdan kaba san haka First Twenty candidates. Na kane ka skul 24 ngut ki khynnah kila ïakhun ïaka matrik bad 19 ngut kila pass.

U Headmaster Jawaharlal Nehru Memorial Secondary School, Mesting Gashnga ula pynpaw ka jingkmen halor ka jingjop u Dimarkithmu uba la wanrah ka nam ka burom jong ka skul bad ka shnong ka thaw baroh kawei.

U Headmaster ula pynpaw ba kane ka jingjop u Dimarkithmu kan long ka nuksa kaba bha bad kaba ai mynsiem ïa kiwei pat ki khynnah ki ban sa iakhun ïaka eksamin ban duriap haka pule puthi jong ki ban poi sha ki kyrdan kaba shakhmat.

Nalor u Dimarkithmu, u Luigi Dalian Pasweth khynnah skul jong ka QC Springside English School ula la wan haka kyrdan kaba lai hadien ba u ioh khur mark 563 (E,M, S&T, SSc, HPE, Kh). Kane ka skul kan dei ka sien kaba ar ba kan ïoh rung ha kane ka First Twenty.

Ka Ibalahun Rymbai na KJP Synod Mihngi HSS bad ka Kyrmen Himiat Rymbui na Marian Hill HSS kila rung haka kyrdan kaba 13 bad 14 haka First Twenty.

Baroh saw ngut ki khynnah kiba tynshain ha kane ka eksamin matrik ki angnud ban pule doktor.