Haka sien kaba nyngkong eh pyni nam ka DCIC iaki mar ba pynmih ki nongseng kam ha Mairang

Syllad | The Rising MeghalayaApril 13, 2023

Ka ophis jong u General Manager, District Commerce & Industries Centre, West Khasi Hills District, Nongstoin kala pynlong iaka District Level Industrial Exhibition ne ka jingpyninam kaba ar sngi hapoh Tirot Sing Memorial Hall, Pyndengumiong.

Ka Kong VA Hynniewta, Additional Deputy Commissioner, Eastern West Khasi Hills District, Mairang kum ka kongsan kala plie paidbah ia kane ka exhibition haka sngi Palei. La iadonlang u General Manager, District Commerce & Industries Centre, West Khasi Hills District, Nongstoin, u Bah BF Sun, ki ophisar na ki tnad sorkar bad ki nongsengkam lajong na East Khasi Hills, West Khasi Hills bad Eastern West Khasi Hills District. 

Ka Kong Hynniewta, kala ong ba kane ka exhibition ka dei ka sien kaba nyngkong eh bala pynlong hapoh Eastern West Khasi Hills District kaba la plie lad iaki nongsengkam lajong bad ki riewdonsap ka thain bad ka jylla hi baroh kawei ban pyni iala ki sap ki talen ki jong ki ha kawei ka jaka. Kala kyntu ruh ia ki paidbah ba kim dei ban khmih lynti than tang ia ka kam sorkar, hynrei ban wad lad wad lynti da kum wei pat ban ieng ha la ki kjat da kaba ba seng ia ki kam lajong.

Ka jingthmu jong kane ka Exhibition kaba ar sngi ka long ban ailad ia ki nongseng kam lajong ban pyni iala ka sap ka phong lyngba ka kam kaba ki trei bad ban ai mynsiem ruh ia kiwei pat ki nongshongshnong ba kin kyntiew iala ka ioh ka kot lyngba ka kam lajong da kaba shimkabu ia ki lad jingkyrshan jong ka sorkar lyngba ka tnat  Commerce & Industries.

Ha kane ka exhibition kaba arsngi, la sakhi ia ka jingdon jong ki dukan bapher bapher kiba kynthup ia ki dukan die jingbam, ki dukan kiba die ia ki jingshna bad jingbuh jingsat ba la ohshrong na ki dieng bad siej, ki dukan die jain bad kiwei kiwei de ia kiba la buh da ki nongseng kam  lajong bad ki tnat sorkar kumjuh. SDPRO Mairang