Haka sien kaba nyngkong ithuh ka Dorbar Shnong Mihmyntdu iaki khynnah bad samla pule ba pass bha

Syllad | The Rising MeghalayaJuly 4, 2023

Ka shnong Mihmyntdu, kaba la niew kum kawei na ki shnong kaba dang duna haka jingdon kiba nang kiba stad, hynrei ka khubor kaba la lam sngewtynnad ka dorbar shnong Mihmyntdu kala mih shakhmat ban pynkup burom iaki khynnah skul bad samla pule kiba pass bha ha ka prokram kaba la pynlong ha iing hall ka Riatsaliya Mihmyntdu haka sngi ba Ar.

Ka shnong Mihmyntdu ka dei ka shnong kaba bun bha ki nongshong shnong kiba im jakpoh da kaba bylla sngi, hynrei ki kmie ki kpa jong ki khynnah kila trei shitom ban pynlut pynsep ban phah skul iaki khun ki kti jong ki ban iabeh ban pynioh jingnang jingstad iaki khun ki kti jong ki.

Ka shnong Mihmyntdu ka dei ka shnong kaba jngai tang 4-5 KM na Jowai, ka sorbah jong ka West Jaintia Hills District, kala nang kiew haka roi ka par bad ka don ka jingbun briew kaba la kynjoh sha ka 10000 ngut ki nongshong shnong bad 1707 iing. Ka don 16 tylli ki skul bad 7 tylli ki skul haka kyrdan secondary school.

Kane ka jingpynkup burom ka dorbar shnong Mihmyntdu kan long ka sien kaba nyngkong ba kan ithuh iaka jingjop ki samla bad khynnah pule bad ban ai mynsiem iaki ban nang trei shitom haka pule ka puthi.

Ar ngut ki samla kila ioh iaka khusnam da ka laptop bad kine ki kynthup iaka Mayanka Pde  kaba pule ha Jowai Govt. Public School  kaba ioh 95 percent naka eksam ICSE (10th Exam) bad ka Delightful Lyngdoh kaba la ioh 90.71 percent haka HSSLC na ka Telangana State Board of Intermediate Education.

Kine ki khynnah kiba shah pynkup burom ki don haduh 35 kiba pass bha bad wan haka kyrdan first division haka SSLC bad ka HSSLC kaba kynthup iaka Science, Commerce bad ka Arts stream.

Nakine ki 35 ngut ka dorbar shnong Mihmyntdu kala pynkup burom ia u Khadwiwed Chyrmang uba ioh pdiang kyrdan Degree of Doctor of Philosophy (PhD) na Annamalai University.

U Waladmiki Shylla nongthaw ain ka Jowai ula long kum u kongsan haka jingiadonlang u Babu Richard B Uriah Principal ka North Liberty Higher Secondary School kum u symbud kongsan haka jing iadonlang ruh u Waheh Shnong Mihmyntdu u ma Abul Phawa, u Nominated MDC ma Octomewot Lamin.

U Babu Richard haba kren ula iaroh iaka dorbar shnong Mihmyntdu iaka sienjam kaba kala shim ban ban ithuh iaka jingjop ki khynnah pule bad wat la ka dei ka jingsdang, ka dei ka nuksa kaba bha kaba pynshlur iaki khynnah bad ki kmie ki kpa ban ai mynsiem iaki haka pule ka puthi.

Haba kyntu iaki samla bad ki khynnah skul ula ong ba ki khynnah, ki samla kim dei ban pynlut iaka por ka por ha ki kamkai kiba ym don jingmyntoi, hynrei ban pyndonkam hok iaka por haka ha ki lynti kiba tei. Ula ong ba ki kynnah ki dei ban trei shitom da kaba jar jar bad ai ba ka jingjop kan kren khamjam shaka pyrthei.

U Ma Wailadmiki shylla haba kren ula ong ki kmie ki kpa ki don ka bynta kaba kongsan bad dei maki kiban peit thuh iaka sap ki khun ki kti bad ban pynshlur iaki ban leh ia kaei kaba ki kwah bad angnud ban jop haka jingim.

Ula ai nuksa ialade ba u kwah ban pule da lain civil service, ki kmie ki kpa jong u ki pynshlur ban pule doktor bad kane kam poi shaei shaei bad kum ha kane ka juk jong ka jingstad ki kmie ki kpa ki dei ban nang ban peit thuh iaka sap ka phong ki khun ki kti khnang baka lawei jong ki kan nym sepei.

Ula kyntu ruh iaki khynnah bad samla ban bate bha iaka por pule khnang baka jingpule bad ban lehkai ne pynbyrngia bad ban jied ia kaei ka lain pule shuwa ka matrik ban suk ka jingim pule puthi.

Ha kane ka sngi u ma Wailadmiki ula pynbna ba ha u snem ban wan un sam khusnam da ka laptop/pisa sha ki khynnah pule jong ka Jowai Constituecny kiba wan haka top 20 haka SSLC.

La pynphuh pynphieh shuh iaka ne ka jingsam khusnam da ka jingrwai bad shad bala shumbynta da ki samla ka shnong Mihmyntdu. Baroh ka jingpynlut pynsep haduh ki khusnam bad tiar sah kynmaw la pynlut da ka bor shnong.