Haka sien nyngkong ioh jingithuh bad shah pynkup burom ki nongtrei ka Jowai Municipal Board

Syllad | The Rising MeghalayaSeptember 10, 2021

Kan dei ka sien kaba nyngkong eh ba ki shnong kin ithuh bad pynkup burom ïaki nongtrei ka Jowai Municipal (JMB) kiba don bynta ban wanrah iaka jingkhuid jingsuba ki shnong ki thaw bad kumjuh ki iew ki hat wat hapdeng ka jingeh kaba ki iakynduh khamtam ka jingbym ioh tulop thikna.

Kane ka shnong kaba ithuh iaka jingshakri ki nongtrei jong ka JMB ka dei ka Dorbar Shnong Mynthong kaba la pynkup burom iaki da ki tiar sah kynmaw bad ki tiar ba kin pyndonkam man ka sngi bad ka song pisa haka sngi Thohdieng haka jingialang kaba long ha community hall ka shnong.

Na ki sengtreimon sngewbha kaba la ithuh iaka jingai jingshakri ka JMB ka dei ka Society for Urban and Rural Empowerment (SURE) kaba la ai da ki tiar jingiada iaki nongtrei haka por ba dang long CEO u Bah SS Syiemlieh.

Ha kane ka jingpynkup burom ka dorbar shnong Mynthong la iadonlang naduh u waheh chnong Mynthong Ma Lamphrang Pohktai, u secretary shnong ba Ryum Khonglah, president seng kynthei Mynthong ka Stately Suting nalor kiwei kiwei.

Na kaliang ka JMB la iadonlang naduh ki nongtrei haduh u Chairman JMB u F War, Executive Officer JMB S Amse, u Assistant Engineer JMB u H Passah.

Ka shnong Mynthong kala pynkup burom haduh 24 ngut ki nongtrei JMB bad Ar ngut ki ASHA kiba trei hapoh ka shnong Mynthong.

Kane ka jingpynkup burom ka shnong Mynthong iaki nongtrei ka JMB ka long kum ka dak ka jingsngew burom ïa u synñiang u bynhei ba ki nongtrei jong ka Jowai Municipal Board (JMB) ki la noh sha imlang sahlang khamtam ban ïakhun pyrshah ïaka khlam jingpang COVID-19.

U Ma Lamphrang Pohktai haka jingkren maitphang ula ïathuh ba ka jingthmu jong ka Dorbar shnong ka long ban pynshlur bad ai mynsiem shuh shuh ïaki nongtrei jong ka JMB kumjuh ki ASHA kiba long ki nongtrei kiba hakhmat eh ban ïakhun ïaka khlam jingpang COVID-19.