Haka sien nyngkong la pynher iaka drone ban kit ia u shynrai Lakadong ha Rilum Jaintia

Syllad | The Rising MeghalayaFebruary 5, 2022

Ka rilum Jaintia mynta ka sngi ka la ioh ba kan sakhi ia ka jingplie pyrda ia kawei na ka rukom pyntreikam da ki kor ki bor kat kum kane ka juk stad kaba mynta, katta ka long ka jingplie ia ka Drone/UAV technology for payload delivery, kum shi bynta ban kham pynsuk pynaram ia ki paidbah nongrep ia u shynrai ‘Lakadong’ kiba don kham sha jngai na ka shnong kaba lait ka lynti syngkien.

Ia kane ka jingplie ne ka jingpyrshang ban pynher iaka drone ban kit ia u shynrai Lakadong la pynlong haka shnong Mulieh, West Jaintia Hills District ka shnong jong ka Padmashri Trinity Saioo, kawei na ki longkmie kaba la jop haka jingrep shynrai Lakadong.

Kumban shu pynkynmaw bai a u shynrai Lakadong la tip ne ithuh ia ka kum One District, One Product (ODOP), kaba hap hapoh ka jingpeit bad khmih jong ka Promotion of Industry and Internal Trade (DPIIT), Ministry of Commerce & Industry, Ministry of Commerce & Industry.

Iaka ODOP la lah ban pyntreikam ryngkat ka jingiasnoh kti lang jong ka AGNIi Mission, kaba hap hapoh ka jingpeit bad khih jong ka Prime Minister’s Science, Technology and Innovation Advisory Council, kaba plie lad ia kino kino ki riew shempang shembuit ba don ha ka ri ban wan lem shakhmat ban pyndonkam ia ka sap ba ki la pynpaw pyrthei bad ha kane ka kynti kaba mynta ia u shynrai na Lakadong, lah ban kit ne bah ia u da kaba pyndonkam da leveraging payload drones (UAVs).

Haba kren ha kane ka jingialang, ka Sumita Dawra, Additional Secretary, DPIIT, ka pynpaw ba kane ka prokram ka long kum uwei na ki mawmer kaban lah ban pynpaw pyrthei ba haduh ki kor jingstad ka juk kaba mynta ki lah ban long ki atiar kiban pynsuk ia ka kit ka bah wat haduh ia ki marrep ba kordor kum u shynrai Lakadong.

Ia u shynrai Lakadong na West Jaintia Hills Meghalaya, la niew bad tip ia u kum uwei na ki shynrai ba bha na kiba bha tam ha kaba ka curcumin content of 7-9%, dei ka jingdon jong une u shynrai, ba suki pa suki ka la sdang ban pynkhie rasong ia ka ka kamai ka kajih ha kane ka district, ha ka juh ka por ba na ka liang ka jylla Meghalaya ka la pan jingbit ban da buh dak kyrpang (a Geographical Indication) ia ki jaka ba pynmih bun bhai a une u jait shynrai.

Namar ka jinglong ba bha tam jong une u shynrai, ka pynlong mynta ia ka India ba kan kamai ym duna ia ka US$ 236.5 million ia u shynrai ha u snem 2018, bad US$ 182.53 million ha u snem 2017.

Wat lada u shynrai Lakadong u la sdang ban sien iewbih bha ka nam ka kyrteng ka jong u, pynban ha ka liang ka kam ban pyniaid iew ia u, ka long kaba eh bad ba jwat bha, tang namar ka jingbym da bang bha ka lynti ka syngkien kaba nang kham pynrem shuh shuh ia ka dor ka bai kit bai bah ia u na ki jaka rep sha ki karkhana sain shynrai.

Kumta da ka jingplie ia ka pyrda jong Drone/UAV technology for payload delivery, kan long ka jingkyrkhu bad kaban iarap shi katdei eh ban nang lah ban lum ban lang ia une u marrep ban pynpoi sha ki karkhana sain ia u ong ka Dawra.

Kum ka jingpyrshang ba nyngkong la sdang pyntreikam  ia ka ODOP Team ha u bnai Iaiong jong u snem ba la dep, ha kaba la lah ban pyniaid ym duna ia ka 13,136 kgs u shynrai Lakadong ba la dep ban khoh stang bha ia u sha ka jaka sain shynrai kaba don ha Ernakulam, Kerala. Lyngba ka ODOP, la lah ruh wat ban kham kyntiew shuh shuh wat ia ka dor ka jong u  katta na ka 150/- tyngka sha ka 170/- tyngka shi kilo ha u snem 2022.

Ka India ka lah ba kan pynmih ym duna ia ka 78% u shynrai ha ka pyrthei, kane ka long kat kum ka jubab kaba la ai da u myntri ba dei khmih ia ka Agriculture & Farmers Welfare, u Narendra Singh Tomar ha Rajya Sabha ha ka 12 tarik Lber 2021, kaba ha u snem 2018-19 ka jinglah ban pynmih ia u shynrai ka long 389 thousand tonnes, kaba kren shai kdar ba lada lah ban iatreilang bad ki kor ki bor, kan iarap bhai a ka ri lum Jaintia ba kan poi sha ka thong ban kylla long ka distrik kaba khlain tam ha ka ri ban lah ban pynmih bun bah u shynrai Lakadong ha ka ri.