Hakhmat Secretariat byrthen shah thngan ka longkmie ban dawa surok

Syllad | The Rising MeghalayaJune 6, 2024

Kawei ka longkmie kaba kyrteng ka Kong Bindas Syiem kaba na ka shnong Umden, Ri Bhoi District ha ka 6 tarik Jylliew ka la pynlong da ka jingiakhih shah thngan khlem buh por hakhmat Secretariat, Shillong ban dawa shna noh mardor ia ka surok na Nongpoh, Umden sha Sonapur.

Kane ka longkmie ka la byrthen ruh ban shong shah thngan ha ban da iap katba ka sorkar kam pat lah ban shna ia kane ka surok.

Haba kren sha ki lad pathai khubor, ka Kong Bindas ka la ong ba ka la ngiah ia ki jingkular thok ha ka por ilekshon. “Kito kiba jop bad rem ha ki ilekshon ki la kular ban pynioh ia ngi ia kane ka surok, hynrei ka la kylla long pynban tang ka kam thok kam shukor. Na kane ka daw, Nga la ngiah bad bitar namar ka jingshisha ba ia lade hi nga la mad ia shibun ki jingeh namar ka jinglong jingman jong kane ka surok. Kumta nga sngew ba Nga don ka hok ban dawa ia ka surok kaba bha,” ka la ong.

Kane ka longkmie ka la iathuh ruh ba ka la dep ban iakynduh ia u Executive Engineer PWD (Roads) bad ka la thoh ruh sha u Symbud Myntri Rangbah ka Jylla ha kaba iadei bad kane ka phang, hynrei kam sngewhun satia ia ka jubab kaba ka la ioh pdiang.

Haba kylli, ka Kong Bindas kala ong ba kam dei ka kamram jong ka ban iakynduh ia u Symbud Myntri Rangbah ka Jylla uba khmih ia ka Tnat PWD (Roads) na ka bynta ban ioh jingshai ha kaba iadei bad ka jinglong jingman jong kane ka surok.

 “Nga la kut jingmut ban iaid shakhmat bad kane ka jingiakhih. Ngan ym mih nangne katba ka Sorkar kam pat long ba khreh ban ai sha ngi ia ka surok ba bha,” ka la bynrap.

Shuh shuh ka la ong ruh ba kam don jingmut satia ban pan ia ka jingkyrshan na kiwei pat ki briew ha ka jingialeh ban pynioh ia ka surok bha.