Halor ka jingjia ha Topcem dawa tohkit ba laitluid u nongtrei kam bhalang

Syllad | The Rising MeghalayaSeptember 1, 2023

Ka National Human Rights Commission (NHRC) ha ka 30 tarik u Nailar ba la dep ka la rejistar ia ka jingujor ba la ujor pyrshah da u nongtrei kam bhalang u Bah Joannes JTL Lamare halor ka jingjia kaba la jia ha ka 24.08.2023 ha ka shnong Thangskai, East Jaintia Hills, kata hapoh ka phyllaw jong ka kompeni M/s Meghalaya Cement Limited (Topcem) ha kaba ki nongshong shnong ki la pynlong ka jingiakhih pyrshah halor ka jingpynlong ia ka public hearing kaba thmu ban pyniar ia ka jingtreikam jong kane ka kompeni.

Na ka liang u Bah Lamare u la phah da ka jingujor sha ka Meghalaya Human Rights Commission (MHRC) ha ka 25.08.2023, ha kaba la phah copy ruh sha ka NHRC ha kaba u la kyntu ia ka Commissioner ba kan shim ia ki lad jingpynshitom pyrshah ia ki bor pulit kiba donkti ha katei ka jingjia ha ka shnong Thangskai.

Nalor kata u la dawa ruh na ka bynta ban pynlong da ka jingtohkit kaba laitluid halor katei ka jingjia bad ban ym shaniah tylli ha ka kaiphot ba la pynkhreh da ki bor pulit.

Ha ka shithi, u la ong, kiba bun ki lad pathai khubor ki la pyni paidbah ia katei ka jingjia ha kaba la iohi ia ki bor pulit kiba la bom lathi bad kynjat naphang ia ki briew kaba la wanrah ruh ka jingmynsaw ia kiba bun na ki, bad na ka liang ki pulit ki la pyndonkam ruh da ki lyer pynsat khmat ne tear gas kaba la wanrah ka jingklumar jingmut bad ka jingkhihwin hapdeng ki paidbah kiba don ha katei ka jaka.

Ha katei ka shithi u Bah Lamare u la phah ruh ia ka link jong ki video kiba la saphriang kiba pyni ia katei ka jingbom lathi bad ka jingsiat tear gas jong ki pulit kaba la wanrah ka jingmynsaw ym tang ia ki shynrang briew hynrei ia ki kynthei kumjuh.

Shuh shuh u la kdew ruh ba ha kine ki video la sakhi ruh ia ki katto katne ngut ki briew kiba kren pynshit bad kren da ki ktien khlem akor.

Na ka liang u Bah Lamare u la kdew ruh halor ki Sections jong ka Indian Penal Code 330, 331 & 348 kiba iadei ia ki hok jong ki riew shimet na ki kam thombor bad ki jingleh tohmet da ki bor pulit.U la ong ruh ba na ka liang ka sorkar kan hap ban siew ia ki jinglut jingsep kiba iadei bad ki lad jingsumar na ka bynta kito kiba la ngat ha ki jingmynsaw ha katei ka jingjia.