Halor ka jingshah set tulop ki nonghikai skul SSA; ki non teaching staff ki la pynkhein aiñ

Syllad | The Rising MeghalayaAugust 20, 2024

Ka seng jong ki nonghikai skul SSA ka Meghalaya Sarva Shiksha Abhiyan Schools Association (MSSASA) haka 19 tarik Nailar ka la ong ba ki nongtrei SSA (Non teaching staff) ki la pynkhein ia ki kyndon ain kaba lam sha ka jingshah set ka jong ki.

Da kaba pynpaw ba ka MSSASA kam long pyrshah ia ka jingiakhih jong ki nongtrei SSA, hynrei ka la ong pat, “Watla ki don ia ka hok ban iakhih katkum ka kyndon Article 19 jong ka Riti Synshar jong ka Ri India, hynrei ka jingiakhih jong ki ka la ktah jur pat ia ka hok jong ki nonghikai SSA kiba la shah set tulop.

Ka la ong ba ki non teaching staff ki la pynkhein ia ka kyndon Article 21 bad Article 300 jong ka Riti Synshar ka Ri India kaba la kdew shai ba yn don mano mano ba lah ban pynkhein ia ka hok jong kiwei pat ki para briew.”

“La ka dei bad ka sorkar Jylla ne bad ki nongtrei SSA ngi ka MSSASA ngim pat long la kloi ban ia pein katba ym pat lah ban pynurlong ia ki hok jong ki nonghikai SSA. Ngin iai bteng ban dawa ia ki hok jong ngi la kalong kumno kumno ruh,” ong u President ka kynhun u Bah Aristotle C Rymbai haba kren sha ki lad pathai khubor.

Kane ka jingpynpaw ka jong u ka long ruh hadien ka jingbym pyllait ia ka tulop kaba dei jong u bnai Naitung ba la dep sha kumba 12,000 ngut ki nonghikai SSA namar ka jingiakhih shong kyllain mungor jong ki nongtrei SSA mynta lah 20 sngi kynthih ban dawa ia ka jingpynkiew tulop kaba 80%.

“Ki don ki kynhun kiba kam ia lade ba ki mihkhmat ia ki nonghikai SSA kiba la ong ba ka long kaba biang lada pynslem tulop na ka bynta shi bnai namar ha ki snem kiba la leit ki lah ban ap ia ka tulop kaba sahteng haduh 4-5 bnai. Hynrei, ngi kwah ban pynshai hangne ba ka MSSASA ha kitei ki snem kam shym la shong kli kti halor kane ka mat,” u la ong.

“Ha ka jingshisha ha u bnai Naitung 2022, ngi la pynlong ia ka jingiakhih kaba heh bha hadien ba na ka liang ka sorkar Jylla ka la khot iakren ia ngi bad mynjur ban wad ia ki lad ki lynti ban pynthikna ban pyllait thikna ia ka tulop jong ki nonghikai SSA. Namar kane mynta ngi la lah ban ioh beit ia ka tulop khlem jingthud. Kumta ngi ai khublei ia ka sorkar MDA 2 hapoh ka jingialam jong u Myntri Rangbah ka Jylla u Conrad K Sangma bad u Myntri ka tnad Pule puthi u Rakkam A Sangma halor ka jinglah ban pynbeit ryntih ia ka kam baroh kawei da kaba pynthikna ia ka jingsiew tulop kaba thikna sha ki nonghikai SSA jong ngi,” bynrap u Bah Rymbai.

U la pyntip ba ha ka 6 tarik mynta u bnai, ka kynhun jong ka MSSASA ka la leit iakynduh bad aiti da ka jingthoh sha u State Project Director (SPD), Samagra Shiksha Abhiyan (SSA) u Swapnil Tembe na ka bynta ban tuklar lem ban pynthikna ban pyllait noh mardor ia ka tulop jong u bnai Naitung ba la dep sha ki nonghikai SSA.

Hynrei u la ong, “Ngi la sngew lyngngoh bad kyndit jur ban tip ba na ka liang ka sorkar Jylla ka la dep mynjur ban pyllait ia ka tulop hynrei ka jingpynslem ka dei namar ka jingiakhih kaba dang iai bteng jong ki nongtrei ki bym dei ki nonghikai.” 

Ha kawei pat ka bynta u la pynpaw ia ka jingkmen ba na ka liang u SPD u la pyntip sha ka Assocaition ba ka ophis jong u ka la shimkhia ban pyllait noh ia kane ka tulop hapoh jong kane ka taiew.