Halor ka rally ka seng Hindu: Ka jingshim rai ban aijingbit ka shong ha ki DC, ong u CM

Syllad | The Rising MeghalayaSeptember 26, 2024

U Myntri Rangbah ka Jylla u Conrad K Sangma ha ka 25 tarik Nailur u la ong ba ka jngshim rai la ban yn ai jingbit ne em ban pynlong ia kino kino ki rally ka shong ha ki bor pyniaid District ym ha ka kyrdan jong u Myntri Rangbah.

Haba jubab ia ka jingkylli halor ka jingpyrshah kaba jur ia ka jingthmu pynlong rally khang bam doh masi da ka seng Hindu ha Shillong, u Conrad u la ong, “Wat ka NPP haba ngi kwah ban pynlong rally ngi hap ban aplai sha u DC bad ki don ki khep ba u DC um ai jingbit satia wat ia ka NPP ba kan pynlong rally.”

Kumta, kane ka rai ka shong eh ha ki bor District, ym ha ka kyrdan jong u Myntri Rangbah, wat haba u Myntri Rangbah u kwah ban pynlong rally na ka bynta ka party lajong hateng hateng ngam shym la ioh jingbit na ki DC, ong u Conrad da kaba pynkynmaw ia u Commissioner & Secretary u Sanjay Goyal ha ka por ba u long kum u SDO ka Ampati um shym la ailad ia ka party jong u ba kan pynlong ia ka rally ha u snem 2008.

Haba pynpaw ba kam don satia kano kano ka jingtuklar na ka liang ka sorkar halor kane ka bynta, u Conrad u la ong, “Ngi long shai halor kane ka bynta. Ia ki jingai jingbit la leh da ka kyrdan Deputy Commissioner bad kumta ka shong ha ki DC ba kin shim ia ka rai la kin ai jingbit ne em da kaba pynshong nongrim ia ka jinglong jingman bad ki mat bapher bapher lem kumta kin ym ioh jingbit satia.”

Haba kylli, u Myntri Rangbah u la ong ba ka jingkylli kam mih satia ban khang pyrshah iano iano ha ka liang ka rukom bam rukom dih ha la ka jong ka jingjied namar ka India ka dei ka ri ka kdup lut ia baroh ki jait niam.