Halor ka thma drok: Ki Sengbhalang ki long laitluid ban iakhih pyrshah Sorkar lada kim tam ia u pud jong ka ain: Paul

Syllad | The Rising MeghalayaOctober 25, 2024

U Myntri ka Tnad Social Welfare u Bah Paul Lyngdoh ha ka 24 tarik Risaw u la ong ba ki Sengbhalang ki long laitluid ban pynlong ia ki jingiakhih pyrshah sorkar lada kim iaid lait ia ki kyndon jong ka ain.

Haba kren sha ki lad pathai khubor u Bah Paul u la ong, “Ngim don kino kino ki jingeh. Ngam don jingeh bad ki Sengbhalang ba kin leh ia kaei kaba ki dei ban leh haba kim jam palat ia u pud bad pynkhein ia ki kyndon ain.”

Kane ka jingkren jong u Myntri ka la wan long ruh ha ka por ba ka Hynniewtrep Youth Council (HYC) ka la shim ia ka rai ban pynlong da ka jingiakhih da kaba tur paidbah shapoh Secretariat ha ka 8 tarik u Naiwieng u ban wan ban pynpaw pyrshah ia ka jingpulom jong ka Sorkar ban pyntreikam ia ki hynniew tylli ki mat jingdawa ban tehlakam ia ka jingshyrkhei jong u drok ha ka Jylla.

“Nga bynrap biang ba ki Seng ki long laitluid ban pynlong ia ki jingiakhih pyrshah ne ban pynpaw ia ka jingbym hun, hynrei ki donkam ban ym jam palat ia u pud jong ka ain,” ong u Bah Paul.

Haba kdew ia ka Nongbah Shillong ia kaba la niew kum ka jaka jngohkai kaba la jied tam hapoh ka ri, u Myntri u la ong, “Ngi la poi sha kata ka kyrdan, ka dei ka burom kaba khraw ia ka Jylla Meghalaya ba ka Shillong kan long ka jaka jngohkai kaba ki la jied tam, bad haduh u 2025 kan don ka jingpyni dak ba kin don haduh jan kumba 70 percent ka jingkiew ha ka jingwan jong ki nongshangkai pyrthei shapoh Meghalaya. Kine ki briew kiba wan bad na ka bynta ki jingmyntoi jong no? Kumta shibun na ka bynta kata ka long kaba kongsan bad wat ngin shah ialam ha ki jingsngew bad ki jingshun pyrshah ia ki rukom synshar khadar.”

Haba bynrap halor ka jingdonkam ban pynthymmai ia ki rukom treikam jong ka Tnad pulit ka Jylla khnang ban pynkupbor shuh shuh ia ki, u Bah Paul u la ong, “Kawei na kine ka dei ka Tnad ANTF kaba nga don katto katne ki jingai jingmut ban iasam bad u Symbud Myntri Rangbah uba peit ia ka Tnad Home (Police).”

U la kdew ruh da kaba ong, “Kawei pat ka bynta kaba kongsan jong kane ka jingiatai ka long ba ki kam khaii bad pyndonkam drok ka dei ka mat kaba eh bha na ka bynta jong nga kum u Myntri ba dei khmih ban iasam lut ia ki jingtip baroh sha ki paidbah.”

“Ki don ki jingtreikam jong ki kynhun kiba heh bad kiba la shemphang bha ha ki kam khaii drok. Ngi la don ia kita kiba lah ban lam sha ki ktem ki jong ki, ngi donkam ban lap ia ka tynrai nangno ki kam shalan ki sdang. Kine baroh ki dei ki jingtip kiba kongsan bha. Kaei kaba ngi leh ngim lah ban pyrta nalor Secretariat bad iathuh sha ki briew ba kane ka dei kaba la jia bad kane ka dei ka jingthmu ka jong ngi, ong u Myntri da kaba bynrap, “Namar kata ha kiba shu peitkai, ka lah ban long ba ngim shym la leh ei ei, hynrei Ngan iathuh ha phi ba ki jingmih ki paw bad ngi dei ban don ha ka kyrdan ban ialeh pyrshah ia kane ka jingma da kaba kham pynkhlain bad pynsted ban ia kaba ngi la ju leh ha ki por kiba la leit noh.”