Hap ialong paralok ka BJP bad ka Congress ha Jaintia Hills

Syllad | The Rising MeghalayaSeptember 8, 2019

JOWAI: Watla ka Bharatiya Janata Party (BJP) bad ka Congress ki dei nongialeh haka seng sain sima, hynrei haka Jaiñtia Hills Autonomous District (JHADC) kin hap ban iadei paralok bad ban ïashong lang haka kynhun jong ka liang pyrshah.

Ka Congress ka don saw ngut ki MDC kaba kynthup ïa u Awhai Andrew Shullai, Aiborlang Shadap, Holando Lamin bad u Arbor Hima Darnei, hynrei da ka jingrung BJP ki saw ngut ki MDC ka UDP kynthup ia u Chairman ka JHADC u Lakhon Biam kiba ym shym la ïoh ka lad ban bsuh khlieh lang haka United Democratic Alliance (UDA) ha JHADC kaba iatreilang ka National People’s Party (NPP) bad ka United Democratic Party (UDP) kin hap ban shong noh haka liang pyrshah.

Kane kan long ka history haka sain hima sima jong ha Jaintia Hills (JHADC) bad ka Jylla ha kaba kine ki ar tylli ki seng kiba long ki nongialeh kin hap noh ban iadei paralok bad ban shong haka liang pyrshah.

U Chief Executive Member jong ka JHADC u ma Thombor Shiwat uba long ruh u nongialam ka UDA ula ong ba ka UDA da kawei ka sur kala rai ban kim ailad ban bsuh khlieh ka BJP ha kane ka Executive Committee kaba iatreilang ka NPP bad UDP ha JHADC.

Kala don ka jingkyrpad na ki nongialam ka BJP ba nym weng Chairman ia u ma Lakhon Biam bad ban kynthup ruh ïa baroh ki MDC BJP haka UDA, hynrei ka UDA ka ieng haka nongrim ban kyntait iaka BJP shabar ka Executive Committee ne UDA kaba ialam ka UDA (NNP & UDP) bad la rai beit ka ka BJP kan hap ban shong haka liang pyrshah ha JHADC.