Hap ïoh jingbit ban leit ban wan na India Bangaldesh

Syllad | The Rising MeghalayaMarch 20, 2020

U District Magistrate jong ka West Jaiñtia Hills District ula pynjari syndon da ka kyndon aiñ hapoh ka Section 144 CrPC ban pyrkhing ïaka leit ka wan jong ki briew na India sha Bangladesh ban tem ïaka jingsaphriang u khniang jingpang Coronavirus.

U District Magistor ha kane ka hukum kaba ula pynmih katkum ka jingbthah jong ka sorkar Jylla  ula ong ba kino kino ki briew kiba leit rwing na India sha Bangaldesh ki hap ban ïoh ka jingbit kaba kyrpang na u Deputy Commissioner, West Jaiñtia Hills, I/c Sub-Divisional Officer (Civil) Sub- Division, Amlarem naduh shiteng synia jong ka 21 Lber, 2020 haduh shiteng synia jong ka 31 tarik Lber 2020.

Shuh shuh ban ïada naka jingsaphriang u khniang coronavirus bad ka jingshngain jong ki nongshong shnong, u Deputy Commissioner, West Jaiñtia Hills ula kyntu ia baroh ki khynnah skul kiba wan na ki jylla ba shah ktah na u khniang COVID-19 ban shong ha ïing lada don dak jingpang ne ym don bad ban phone ha kine ki number 108/ 6009693315 ban ïoh jingïarap bad ban buddien ïaka jinglong jingman ka koit ka khiah.

La kyntu ïaki khynnah skul ban bud ryntih ïaki lad jingïada bad ban kiar na ki jaka bun briew 14 sngi bad la banjur ïaki kmie ki kpa ban ai ka jingiatreilang ha kane ka jingiakhun pyrshah ia u kniang coronavirus ban shongshngain lang baroh.