Hap phet krad ki Pulit ka Jylla hadien ba shah lun maw bad shah siat da ki jri siat sim ha Lapangap

Syllad | The Rising MeghalayaAugust 26, 2023

Ki pulit ka Meghalaya kiba pahara ha shnong Lapangap khappud Meghalaya-Assam la kynnoh ba ki la shah beh haki jaitbynriew Karbi kiba shong basah ha khappud haka Sngi Saitjain.

Ka jingiakynad ki pnar bad ki karbi kala sdang na Khanduli bad kala pur sha ka shnong Lapangap bad ha u bnai Naitung bad Nailar jong une u snem, la kynnoh ba ki karbi kila wan ban jynrat ia ki tynrai dieng kiba la thung haka shnong Lapangap naka bynta ban pynjyrngam ia ia ki lum ki wah kiba syllen.

Hynrei ha kine ki kyndiat sngi, kata haka 18 tarik Nailar ki paidbah Karbi da ki spah ngut na ki thain Tahpat kiba dang hap ha ki jaka iakajia khappud hapdeng Meghalaya Assam ha ka jingsynran ki dkhot ka Karbi Students’ Association (KSA) kila wan ban jynrat biang iaki tynrai dieng.

Ka bor synshar district West jaintia Hills ruh hadien kane ka jingjia kala phah bor pahara ban wanrah iaka jingsngew shngain ki paidbah, pynban mynta ka sngi u paidbhur na Karbi da ki spah ngut kila tur sha katei ka jaka kaba la tip kum Lum Umshyrngat beh iaki Pulit ka Jylla. La kynnoh ba kine kine ki briew na ka jaidbynriew Karbi kila lun da ki maw ki dieng bad kila siat ruh da ki ki jri siat sim kaba la pynlong iaki pulit ban phet na katei ka jaka.

Haba iakren bad u waheh shnong u ma Deimonmi Lyngdoh ula iathuh ba kane ka jingjia kala jia haka por kumba 2 baje nohphaisngi. Ula ong ba kine ki pulit ki don tang 15 ngut bad na ka daw ba ki duna briew kila hap ban kynrandien.

Nalorkata ula iathuh ruh ba ka dorbar ka la rai ban kyrpad ia u SP ka West Jaintia ban pyunbun bor pulit pahara ban shong ha Lum Pynthor khnang ban shngain ki nongshong Shnong ban leit bri leit lyngkha.

Shuh shuh haka dorbar ula ong ba ki la rai ban pyntip sha u DC ban pynkynriah iaki pulit ka Assam kiba wan ban shna ktem ha u Lumumshyrngat ba dang hap hapoh u pud u sam jong ka Dorbar Shnong Lapangap.