Hap pyndem u VC hakhmat ki samla pule; Kular ban thung ia ka Enquiry Committee

Syllad | The Rising MeghalayaNovember 8, 2024

U Vice Chancellor ka North Eastern Hill University (NEHU) u Prof PS Shukla ha ka 7 tarik u Naiwieng u la kular ban thung noh mardor ia ka Enquiry Committee ka ban khmih halor ki jingdawa ban weng noh ia u Registrar bad u Deputy Registrar bad ban shim ia ki sienjam katkum ka kaiphod ka jong ka.

Ha ka shithi sha u President ka NEHUSU, u Prof Shukla u la kubur ba ki don katto katne ki mat kiba kiba la pynmih ka jingpyrshah ia kine ki briew da ki samla pule kiba la dawa ba dei ban weng noh ia u Registrar bad u Deputy Registrar.

“Ka University ka don ia ki katto katne ki rule bad ki kyndon treikam na ka bynta ban tehlakam ha kaba iadei bad kiba kum kine ki kam.Kum u Vice Chancellor, ka kamram ka jong nga ka long ban pyntreikam ia kine ki rule bad ki kyndon treikam. Kumta ngan sa khot ia ka jingialang jong ka Executive Council ban thung ia ka Enquiry Committee hapoh ka 11 tarik u Naiwieng.

“Ka University ka don ia katto katne ki rule bad ki kyndon treikam ban leh ia kum kine ki kam. Kum u Vice Chancellor, ka kamram jong nga ka long ban pyntreikam ia kine ki rules bad ki kyndon treikam. Kumta, ngan sa khot ia ka jingialang jong ka Executive Council ban thung ia ka Enquiry Committee hapoh ka 11 tarik Naiwieng” ula ong.

U VC u la kular ruh ba yn pynshong nongrim halor ka jingshem jong ka Enquiry Committee hashwa ba un sa shim ia ki sienjam kiba dei ban leh.

Nalor kata u Prof Shukla u la mynjur ruh ban thung ia ki Pro Vice Chancellor na ka bynta ka Shillong bad Tura Campus hapoh ka 30 tarik u Naiwieng.

“Nga kum u Vice Chancellor nga mynjur ha ka nongrim ban thung mardor ia ki Pro Vice-Chancellors na ka bynta ban pynjanai ia ka jingtreikam jong ka Shillong bad Tura Campus da kaba bud ia ki rule bad ki kyndon treikam kiba katkum ka University Ordinance, kata la kumno kumno hapoh jong ka 30 tarik u Naiwieng 2024,” u l ong ha ka shithi.

Haba kyrpad ia ki samla pule kiba pynlong jingiakhih ba kin sangeh noh ia kane ka jingiakhih ka jong ki, u VC u la ong, “Nga kyrpad bad kyntu ia phi ba phin sngewbha ban sangeh noh ia ka jingiakhih khnang ba ka jinglong jingman kan wanphai biang kumba ju long baroh shikatta hapoh ka University.”