Hap pyndem u VC ka NEHU ha ka JAC, pynthikna ban pynurlong ia ki jingdawa hapoh 5 sngi

Syllad | The Rising MeghalayaNovember 16, 2023

U Vice Chancellor ka skulbah NEHU, u Prof PS Shukla ha kaba khatduh ula hap ban pyndem noh hakhmat ka Joint Action Committee (JAC) jong ka NEHUTA, NEHUNSA bad NEHUSU hadien lai bnai jong ka jingiakynnoh markylliang da kaba kular ban pynurlong ia ka jingdawa ka jong ki ban weng kam noh ia u technical officer/senior consultant u Rohit Prasad ia kaba ka JAC ka la kynnoh ba ka jingthungkam ia u kam shym la long satia katkum ki kyndon.

Hadien ka jingialang kaba long haka 16 tarik Naiwieng, na ka liang u Chairman ka JAC u Prof Lakhon Kma ki la ong, “Ngi la shim ia ka rai ban pynsangeh shipor ia ka jingiakhih ka jong ngi bad naduh lashai ka sngi ka jingshim klas kan bteng biang, ki nonghikai ki lah ban leit ban shim iala ki jong ki bynta kumjuh ki staff sha la ki jong ki kam ki jam.

Kane ka jingialang ka la long kaba seisoh watla na ka liang u VC uba la pan por san sngi kynthih ban pyndep  halor kane ka kam um shym la lah ban ai da ka shithi ba pura ne official letter kaba iadei bad ka jingweng kam noh ia u Prasad.

U Prof Kma u pyntip ruh ba u VC u la mynjur ban thaw ia ka committee ban iakren halor ki mat kiba iadei bad ka rukom ai marks bad halor ki jingeh jong ki khynnah hostel nalor ki jingdonkam kiba iadei bad ka koit ka khiah nalor kiwei pat.

Ha kaba iadei bad ka jingkynthup ia ki samla pule kum ki kdhot jong ka academic council (AC), u General Secretary ka NEHUSU u Bah Banpynbiang Riang u la ong ba na ka liang u VC u la mynjur ia ka jingdon bynta lang jong ka NEHUSU hapoh ka council khnang ba yn lah ban pyniaid shakhmat ia kiba bun ki kam kiba iadei bad kane ka skulbah.