Hap pynpra noh ka Assam ïaka ktem Pulit ha Khatkasla, ïa pyni bor ki pulit Assam- Meghalaya ryngkat ki spah spah ngut ki paidbah

Syllad | The Rising MeghalayaJune 13, 2019

JOWAI: Ka jingthmu jong ki Pulit Assam ban shna ktem pulit ha Khatkasla ka jaka kaba hap ha Khappud Meghalaya-Assam kala pulom noh hadien ka jingpyni bor ki ar district haka jingiadonlang ki pulit bad u paidbah ka shnong Khatkasla bad Psiar haka sngi Palei.

U Border Magistrate ka West Jaiñtia Hills u Bah Ferdinand Basan, u Dy. SP West Jaiñtia Hills u Bah Donkupar Moksha kila hiar shuwa haka sngi Balang pynsangeh ïaka jingthmu shna ktem ki Pulit Assam ha katei ka jaka, hynrei u Pulit bad ka bor synshar ka Assam kila leh bymsuidniew.

Kane ka jaka ba thmu ki pulit Assam ki shna ktem pulit ka dei ha Iurim Biam, kaba hap ha Khatkasla ka lynti ban leit sha Umkhyrmi bad Mokoilum ba hap ha West Karbi Anglong, Assam. Kane ka jaka ka jngai tang kumba 10-15 KM na Mokoilum.

Hadien ba ki Pulit Assam kila leh bymsuidniew ïaka jingbthah jong u Border Magistrate ka West Jaiñtia Hills, hynne ka sngi Palei kila hiar biang sha katei ka jaka ryngkat ka kynhun Pulit, u paidbah nongshong shnong da ki spah spah ngut bad hadien ka jingïakren ki pulit ka Assam kila hap ban phet na katei ka jaka bad pynpra iaka ktem jong ki bad kit ïaki tum ki tam jong ki.

Haka sngi Balang ka bor synshar jong ka West Karbi Anglong kila wan sha katei ka jaka haka jingialam u Border Magistrate, West Karbi Anglong, Assam ryngkat ka pyrton pulit bad CRP.

U Border Magistrate jong ka West Jaiñtia Hills U Bah Ferdinand Basan ula ïasaid bad ieng pyrshah tyngeh ïaka jingthmu jong ka Assam ban shna ktem pulit ha katei ka jaka. Ula dawa na ki bor synshar district ka West karbi Anglong, Assam ban pyni da ki kot ki sla, halor ka jingkam jong ki ba ka dei ka sorkar Assam kaba bthah ïaki ban shna ïaka ktem shipai.

Kane ka jaka ka dei kaba kila dep ban lur da ka puh shilum bad khyllem ïaki dieng bad kila dep ruh ban shna ïa iing trep ban shna ïaka ktem Pulit jong ka Assam.

La bun bun sien ki Pulit jong ka Assam kila thmu ban shna ktem pulit hakatei ka jaka, hynrei mynta ka kynti ka sur u paidbah kala jop.

Kumban shu pynkynmaw Kyllalyngkot 29, 2018 ruh ha kane ka juh ka shnong ka Assam kala wan da ki puh shilum ban pynkhyllem bun tylli dieng bad pynmadan ïaka jaka ban shna Out Post hi, hynrei ka bor District jong ka West Jaiñtia Hills kala hiar ban pyn sangeh mardor ka jingshna ne jingtih lum jong ka sorkar Assam

Hadien ba u Pulit Assam ula dep pynpra ïaka ktem, la lum jingialang ha iing Waheh Shnong Psiar haka jingiadonlang u Waheh Shnong Khatkasla bad Moolaber, u MLA Nujorki Sungoh, MDC, Dolloi Elaka Raliang, Rikut Parien nongialam barim ka JSU bad kiwei kiwei.

La rai ha kane ka jingialang ban ïakynduh ïa u Myntri Rangbah, Myntri kam Pohiing ka Jylla bad ban dawa mardor ban buh iaka ktem pulit jong ka sorkar Meghalaya ha kitei ki shnong.

Halor kane ka jingjia u Myntri Rangbah ka Jylla Conrad K Sangma ula shimkhia ban iakren bad ka sorkar Assam bad mar mar U Myntri Rangbah ka Assam Sarbananda Sonowal ula bthah ïaki Assam police bad mih na katei ka jaka, la ong u Myntri kam Pohiing ka Jylla u James K Sangma.