Hap shong ki paidbah Narpuh haka jingdum, kyntu ka KSU ban maramot iaka line bording

Syllad | The Rising MeghalayaJune 25, 2024

Hadien ka jingwan ther jur u slap bad ka jingtwa khyndew ha kiba bun jaka ha Elaka Narpuh, mynta pat ki paidbah ki hap ban shong haka jingdum khlem bording la bun bun sngi namar ka jingkhyllem ki post bording ha kiba bun ki jaka.

Ha u kyrwoh bala phah da u vice president KSU Narpuh Circle, u Bah Phanuel Tongper, ula kyntu ia ka sorkar jylla bad ka tnad pynmih bording MeECL ban pyndep kloi ia ka ban pynshna iaki post electric ba la khyllem hapoh thaiñ Narpuh naduh Tongseng, Sonapyrdi bad kiwei kiwei ki shnong hadien ka jingwan lyngshop ka bor mariang.

La don ruh shibun tylli ki post light ba la khyllem ha ki bynta ka shnong Sonapyrdi bad sha kiwei ki bynta ruh. Haduh mynta la jan dap ar taïew ka jingduh light naduh Tongseng shaduh Ratachera. Haba ioh iakren lyngba ka phone bad u SDO na Moowakhu, u la ong ba la kumno kumno ha ka sngi palei (Thursday) la tikna ban ioh light, ong u kyrwoh ka KSU.

Ka KSU Narpuh Circle kala pynkynmaw ruh ba ha ki khyndiat por ba la leit dang ha kito ki contract ba rim bad ki lineman kiba na ka thaiñ Narpuh hi, ngi kynmaw ba lada don ka jingduh light kaba jur ruh ki lineman ki trei kloi, hynrei mynta pat ba dei da u contractor ba thymmai ba shim contract kim da tip ne experience bha ia ka jinglong jingman ka thaiñ kala wanrah iaka jingduh bording kaba bun bun sngi.

Wat la katta na kaliang ka KSU Narph Circle kala banjur iaka sorkar bad ia ki contractor ba pyntrei ban pynkloi ka jingtrei khamtam ba dei ki por iakhun exam shiteng snem ki khynnah skul.