Hapdeng ka jingiphuh iphieng kut noh ka jingrakhe ia ka Seng Kut Snem kaba 124 ha Madan Weiking

Syllad | The Rising MeghalayaNovember 23, 2023

Ka Seng Khasi Kmie haka 23 tarik Naiwieng, kala pynkut noh ia ka jingrakhe ia ka Seng Kut Snem shi bynta ban kynmaw ia ka jingdap 124 snem naduh ba la seng na ka bynta ban iada bad pynneh pynsah ia ka jinglong kyrpang jong ki khun Khasi Khara hapoh  kane ka Bri u Hynniewtrep.

Ia kane ka jingrakhe la pynlong ha ryngkat ka nguh ka dem kaba la sdang na Madan Iewrynghep bad hadien kane la pynlong ka jingiaid paidbah shaduh Madan Weiking da ki khun ki hajar.

Hapdeng ka jingiaid paidbah, la sakhi ba ki hajar ngut ki khun ki hajar ha ryngkat ki riam tynrai nalor ki jingtem jingput tynrai bad ka rwai ki jingrwai pynneh ia ka riti dustur jong  u khun Khasi Khara.

Ha kane ka sngi rakhe la wan iashim bynta lang da u Chief Executive Member (CEM) ka Khasi Hills Autonomous District Council (KHADC) u Bah Pyniaid Sing Syiem, u Syiem ka Hima Khyrim u Paiem Balajied Sing Syiem, u Syiem ka Hima Mylliem u Paiem Ainam Manik Syiem, u President ka Seng Khasi Kmie u Rgh Oplysor Pyngrope lem bad kiwei ki nongkitkam ka Seng Khasi, ka Kong Matsiewdor War Nongbri nalor kiwei kiwei.

Lah ban kdew ha ka 23 tarik Naiwieng 1899, 16 ngut ki rangbah Khasi kila ieng borbah ban aijingiada bad ban pynneh pynsah ia la ka jong ka Riti ka Dustur bad ia ka jinglong kyrpang jong ka jaidbynriew, bad ha ka juh ka por ban iada na ka jingshah tyllep jong ka Niam Tynrai Niamtre ha ki bor synshar jong ka Sorkar phareng da kaba seng ia ka Khasi Young Men’s Association.

Hadien ba la seng ia ka Khasi Young Men’s Association, la rakhe ia ka 23 tarik Naiwieng man u snem kum ka Seng Kut Snem hynrei dei tad hadien u snem 1901 la pynkylla noh sha ka Seng Khasi.

Haba kren sha ki lad pathai khubor u Assistant General Secretary ka Seng Khasi Sengkmie U bah Paia B Synrem ula ong ba kane ka jingrakhe ia ka Seng Kut Snem ka dei ruh ban ainguh ia u Blei uba la kyrkhu ia ki khun ki hajar  ban bha ka kamai ka kajih.

U Rgh Paia B Synrem ula iathuh ba ka seng ka dap da ka jingkmen namar kala ioh ka jaka kaba heh kumba 6 akar ha New Shillong ba la ai sngewbha da u Bah Philip Gene Khongsngi uba shong ba sah ha Wahingdoh, bad kane kan nang iarap ia ka seng ban pyniar ia ka jingialap ha kaba iadei bad ka jingialeh ban iada bad pynneh pynsah ia ka jinglong kyrpang jong ki paid Khasi.