Hapdeng ka jingiphuh iphieng kut noh ka Shad Suk Mynsiem ka Seng Khasi Kmie, iashimbynta 1451 ngut ki nongshad

Syllad | The Rising MeghalayaApril 10, 2023

Ka Shad Suk Mynsiem ba lai sngi lynter ka Seng Khasi Kmie, ka la poi noh sha kaba kut haka sngi Nyngkong, hapdeng ka jingiphuh iphieng bad kaba shongkun shong Blei, bad la sakhi ia kata ka jinglong ba nylla bad ba kyrpang ka jaidbynriew Hynñiewtrep Hynñiewskum, ha lympung Weiking, Jaiaw, Shillong.

Kumba ka ju long ka sngi ba kut jong ka Shad Suk Mynsiem, ka dei da ka jingialum lang ha ïing Seng Khasi, Mawkhar, Shillong, ha kaba ki Duhalia, kila shim ia ka bynta ban tem ia ka ksing lumpaid hadien kane u Rgh Banteilang S Rumnong President ka Seng Khasi College/ Chairman ka Publicity Committee ka Seng Khasi Kmie, u la shim ia ka bynta ban pyniaid ia ka jingialang.

Hadien kane u Rgh Dipshon L Nongbri, President Seng Khasi Mawlai, u la shim ia ka bynta ban ban ialam ia ka jingduwai, hadien kane, ka la dei pat ka por ba ki nongshad lem bad ki nongialam ba rangbah ka Seng Khasi Kmie, bynrap ki parakur parakha, la ia mihlang khrui na ïing Seng ryngkat ka sur ka ksing lynti  ban iaid kjat sha Lympung Weiking, Jaiaw,

Haba la poi ha lympung, shwa ban sdang ia ka shad, la ioh ia ka nguh ka dem ba la ai ka Komiti u Tymmen U San ia kaba la pynbud pat daka jingshad  ha baroh ki hynniew tyli ki skit.

Ha kane ka kynti ki nongshad  ba wan ban iashim bynta ki long ki shynrang  shynrang 727 bad ki kynthei  724 bad baroh ki long 1,451, kaba da pynishongkun shong Blei, haduh kata kata, katno tam lei lei haba ka ki kjat sngi ba shat thaba jong ka ‘mei ngi’ ki da wan ban shat thaba ha ka riam shad kaba nylla ba hara.

Nalor ki nongshad, la wan ruh ban skahi da kiba bun ki kynrem ki lyndan  bad ba kham paw ki long naduh u Lat ka jylla u Phagu Chauhan, u Symbud Myntri Rangbah bah Prestone Tynsong CEM KHADC bah Titostrawell Chyne,  u DGP ka jylla  u Dr LR Bishnoi, nangta ki heh ophisar  jong ki shnat treikam bapher bapher ka sorkar jylla bad kiwei kiwei.

Shuh shuh la wan ban ia synran lang ruh da u President bad Secretary jong ka Sein Raij Jowai, ki Sein raij Shjillong u Dolloi ka Elaka Jowai, ki Pressident bad ki Secretary jong ki jylli bad ki tnat ka Seng Khasi. Nalor la pyndap hi smam ia baroh sawdong ka lympung shad da u u paid byllien, kiba da pynleit jingmut ang artad ha ki sur jong ka ksing, ka nakra, a bom, ka tangmuri.

Haba kut ka shad ka kmen, shwa ban wanphai biang sha Iing Seng, Mawkhar, la ioh ia ki kyntien ai khublei ba la ai da u Rgh Hammar Singh Kharhmar Cultural Secretary Seng Khasi Kmie, ka jingduwai na u Rghj Donbokstar Kurkalang,  bad la pynhhiar ia ka lama ka seng da u Rgh Rubi Binong, President Seng Khasi Raid Marngar bad pynbud biang da ka jingduwai da uwei na ki dkhot ka Kynhun U Tymmen U San bad hadien kane, la iaid tawiar lai sien lai wat ia ka lympung bad wanphai noh artad sha Iing Seng, ryngkat ka phawar arted lynti.

Haba la poi ha Iing Seng, u Rgh Hainess Marbaniang, General Secretary, Seng Khasi Kmie, Mawkhar, Shillong, u la shim iaka bynta ban ai ia ki kyntien ai khublei bad sa pynkut da ka shad mastieh ha phyllaw jong ka Seng Khasi Hall.

Haba phaidien sha ki lai sngi jong kane ka ka shad ai nguh ba shi sien shi snem, katba nang mih ki sngi, ka dur ka dar, ka jinglong jingman hi jong kane ka shad ka iai phuh iai phieng, namar dei ha kum kane ka samoi, ba ia kata ka tynrai jingeit kaba janai bad ba jylliew bha jong ka jaidbynriew Khasi, da shisha ka wan ba kan mihpaw ha kane ka shad, namar ka kynthei haba ka iuh kjat ha lympung, ka da wan ha ka longrynieng kaba khuid ba suba ba nylla bad sotti ka jong ka, katba u shynrang, ka riam ka beit ka jong u ka kup shisha ia ka bynta kum u nong ri u nong da u nongsumar sukher ialade, ia la ka kur ka jait bad ia la ka it ka hima, ka ri ka muluk.

Da kumta, kaei ka dulir bah ban pynpaw ia ka jinglong ba  nylla kum ka jaidbynriew, lah ban ong ba ia ka jubab kaba shai bad ba aw shynna eh ka dei ha ka dur ka Shad Suk Mynsiem, kaba pynpaw ia ka jutang kaba la iateh hapdeng u Bynriew bad la U Blei Nongthaw Nongbuh, haba la bit la biang nadong shadong, u bynriew u pynpaw ia ka jingsngewnguh ka jong u ia la u lei Trai Kynrad da ka ka shad ka kmen ha ryngkat ka duwai ba U Blei Trai Kynrad uniai theh sei ia la ka kyrkhu kyrdoh ha u khun ynriew ba un lah ba un kai un padun, un kamai un kajih, ba un trei un ktah ban roi parum pareh ha snieh jong kane ka sla pyrthei, ha ryngkat ba un nang iar ka Tip Briew Tip Blei ka Tip Kur Tip Kha Ban Ieit Ialade bad Burom ia kiwei bad ban Kamai Ia ka Hok.