Hapdeng ka jingiphuh iphieng kut noh ka Shad Suk Mynsiem Seng Khasi Mawlai

Syllad | The Rising MeghalayaApril 3, 2022

Ka Shad Suk Mynsiem ba ar sngi jong ka Seng Khasi Mawlai, ka la poi noh sha kaba kut mynta ka sngi Umni ka 3 tarik u ïaiong 2022, ha lympung shad ha Mawroh, ha kaba ki nongshad kynthei bad shynrang wat haduh ki hep barit ba la wan ban ïashim bynta ka la jan kynjoh sha ka saw spah ngut eiei.

Kane ka shad ainguh aidem ba shisien shi snem ka Seng Khasi Mawlai, la sdang ïa ka naduh hynnin ka sngi Pamtiah ka 2 tarik Ïaiong 2022.

Kane kan dei ka sien kaba ar ba ka Seng Khasi Mawlai, ba kan lah ha kaban pynlong ïa kane ka shad ka kmen ka jong ka, ha kane ka lympung shad, hadien ba ka la ïoh sngewbha ïa kane ka jaka na ka ophis u Syiem ka Hima Mylliem.

Kane ka Shad Suk Mynsiem ka Seng Khasi Mawlai, ka long ruh kum ka dak ka jingkyrsiew thiah ïa baroh ki parakur parakha na jan bad na jngai ba kin long ruh kiba la pynkhreh ban poi ïashim bynta sha ka Shad Suk Mynsiem kaba lai sngi lynter ba juh pynlong ïa ka man la u snem da ka Seng Khasi Kmie, Mawkhar Shillong, kaba ha kane ka kynti kaba mynta, kane ka shad ka kmen kan long ha ka 9, ka 10 bad ka 11 tarik mynta u ‘nai Ïaiong ha lympung shad madan Weiking, Jaiaw, Shillong.

Haba phai biang sha kane ka Shad Suk Mynsiem ka Seng Khasi Mawlai, da ihun ithiang ban peit namar ki nongshad kynthei bad shynrang shriak ha la ka rai ka beit tynrai ryngkat ka jingdeng bad kieng ïa ki mar ksiar ki mar rupa, kiba shat phyrnai ha khmat ki kjat jong ka mei ngi, kaba da wan ba kan dohieit bad suit rong stem phyrnai, ban pyniphuh iphieng ïa ka lympung shad hi baroh kawei.

Kumba ka juh long shwa ban nohkjat ha ka lympung shad, ki nongïalam ka Seng Khasi Mawlai, ki da pynlong ïa ka nguh ka dem ka dwai ka phirat ban ïa pan hukum ba U Blei Trai Kynrad ba un ai ïa ka suin bneng kaba shai, kaba ki bor jong ka mariang wat lada ki dei ka por ka samoi ka jong ki ban wan, hynrei ba kin da ailad pat ba kane ka shad ka kmen kan ïaid beit kan ïaid ryntih.

Ïa ka nguh ka dem ha ka por mynstep la pyndep da u chairman ka Komiti U Tymmen U San Seng Khasi Kmie, Shillong u Skor Jala bad ha shwa ban sdang pat ka shad nohkjat la ïoh pat na u vice chairman Komiti Tymmen U San u Rgh Donbokstar Kurkalang ryngkat ka jingsynran lang ki khmat nongïalam ka Seng Khasi Mawlai ba kynthup naduh u President u Rgh D.L Nongbri, u General Secretary u Rgh Phira Warnongbri ryngkat u MLA ka Mawlai Constituency u Bah Process T. Sawkmie.

Hynne pat ka sngi ba kut, nalor ki nongshad ki duhalia, la wan ruh ban pynshit pynshngain ïa kane ka shad ka kmen, da ki riew pawkhmat ba kynthup ïa u MLA North Shillong u bah Adelbert Nongrum, nangta u MDC Mawlai Constituency u bah Teiborlang Pathaw, Acting Syiem Hima Mylliem Pa’iem Ainam Manik Syiem, u Rgh Hainess Marbaniang, General Secretary Seng Khasi Kmie ki dkhot nongkit kam JPK Seng Khasi Kmie, ryngkat u paid byllieñ najan bad na jngai ban pyndap hi smam ïa kane ka lympung shad baroh kawei.