Hapdeng ka jingiphuh iphieng la pynkut iaka Dorbar Ñiamtre ki khun ka Ri 12 Dolloi 30 Syiem ha Jowai

Syllad | The Rising MeghalayaDecember 22, 2024

Ka Seinraij Jowai haka jingpeit jingpyniaid ka Ñiamtre Committee bad haka thong ban pynskhem iaka jinglong kyrpang ka jaitbynriew Hynniewtrep Hynniewskum, haka 21 tarik bad 22 tarik Nohprah kala pynlong iaka Dorbar Ñiamtre ha madan Rangkaw Tpep-pale.

Haka sngi nyngkong jong ka Dorbar Ñiamtre kala don ka prokram kyrpang ha kaba ki khun ka Niamtre naki raij, ki shnong bapher kila wan ban iashim bynta haka jingdonlang u Dolloi ka Elaka Jowai Puramon Kynjing bad ki riew rangbah kumjuh ki samla ka Seinraij Jowai.

Katba haka sngi kaba bud, iaka Dorbar Niamtre la pyniaid da u Raymond Nartiang, Chairman NTC bad la ioh ka nguhblei nguhsyiem na u Myown Chyrmang, Kni ka Raij Jowai, kumjuh ka jingpynher iaka lama da u SK Lato, Ex-President Seinraij Jowai katba u Hercules Toi, President Seiñraij Jowai ula ai ki kyntien pdiang burom.

U Valentidio Paswet, Sangot Paswet kum u shakri ka Raij ula iathuh iaka khana lyngkot shaphang ka shnong Jowai katba ki riew rangbah kila ai ka jingkren halor ki phang bapher bapher kynthup naduh u Nitanjan S. Manner, Vice-President Seiñraij Shangpung uba la kren halor ka phang “ i dor ka niam wa kha ka Bei”, u Rangbah Aiban Swer, Sengkhasi Kmie ula kren halor ka phang “Ka Ñiam rukom, dustur, riti ka pyrta iaphi” katba u Puramon Kynjing, Dolloi Elaka Jowai ula kren halor ka phang “Ka Ñiamtre wa hikai yei kyrpang ka jaitbru”.

Shuh shuh ha kane ka Dorbar Ñiamtre la pyllait paidbah ruh iaka Almanak 2025 jong ka KKC Seinraij Jowai da u EMH Passah, Vice-President, Seinraij Jowai bad kyrpang la pynkup burom iaki Tymmen thangbriew ka Raij Jowai, kum ka dak ka jingsngewnguh sngewburom ka Ñiamtre Committe, Seiñraij ia kine ki rangbah kiba shimkhia ban pyndep iaka nim thang haba don ka jinghap jingur ki khun ka Niamtre hapoh ka Raij ka shnong kaba long katkum ka hukum adong u Trai kynrad ia u Hynniew basa.

La pynphuh pynphieng iaka Dorbar Niamtre da ki jingshad jingrwai sur tynrai ba la shim bynta da ki khun samla na ki Seinraij bapher bapher bad khatduh shwa ban poi ka bynta kaba kut u Deibha Rymbai, Secretary NTC Seinraij ula ai ki kyntien sngewnguh katba ka Kongka Siangbood, Langdoh ka Raij Jowai kala pynhiar iaka lama bad pynbna ruh ba ka Dobar Niamtre ki khun ka Ri 12 Dolloi-30 Syiem ha u snem 2025 kan long ha Raij Khonshnong, Laskein Block.