Hapdeng ka jingiphuh iphieng la pynkut noh ia ka Shad Suk Mynsiem 2021 ka Seng Khasi Kmie
Ka Seng Khasi Kmie lyngba ka Cultural Committee, ka la lah ban pynkut noh ia ka Shad Suk Mynsiem 2021, kaba long hapdeng ka jingiphuh iphieng da ka jingwan ban iashim bynta da ki rang samla bad ki thei sotti na ki tnat ki jylli bad ki dong ki shong jong ka ri lum Khasi.
Namar ka jinglong jingman jong ka pyrthei ka mariang ha shi tyllup ka snieh jong ka sla pyrthei bad ka jingdon kam ban bud ryngkhi ia ki adong adit jong ki bor synshar, kane ka shad ainguh aidem kaba shisien shi snem la hap ban pynrit bha ia ka, lada ia nujor bad ki sngi ki snem kiba la leit noh.
![](https://www.syllad.com/wp-content/uploads/2024/09/JIT-Vacancy-823x1024.avif)
Kane ka shad ka kmen u khun Khasi ba bat ba snoh ha la ka jong ka niam tynrai, la sdang ia ka naduh ka 10 tarik katta ha ka sngi Saitjain ka taiew ba la dep, bad iai bteng hynnin ka sngi Robibar bad hynnei pat ka sngi ka sngi kaba lai ba dei artad ka sngi kaba kut, la lah ban pyniaid beit pyniaid ryntih ia ka, ha kaba ki rang samla ki thei sotti ki la ioh ban mih lympung ban shim bynta ha kaban shad pynhap tara ia la ka met ka jong ki ha ki sur jong ki skit shad.
Hapdeng ka jingwan ban lyngshop ka khlam ka ngoh, hynrei, ia kane ka shad ka kmen ba shisien shi snem, ka Komiti jong u Tymmen U San ka Seng Khasi Kmie, ki da hiar da ka nguh Blei ka Dem Blei, kaba sdang shwa da ka shat ka khein ha ka step jong ka 10 tarik ha lympung Weiking, kaba ka nia ka jutang u Tymmen U San ka wan ba kan mih paw ha ka lengbah ka lengsan, kaba kat kum ka jingiapan, ba ka hukum Blei najrong na tbian, ka ai ia ki dak ki shin, ban iaid shakhmat ia kane ka shad ka kmen, kaba ha u snem ba la dep, kum ka Seng ryngkat ki parakur ki parakha ki la mad ia ka jingduh ban mih lympung ban pyndep ia kane ka shad ka kmen.
Namar ki adong ki adit na ka liang ki bor synshar, ka Seng Khasi Kmie, ka da iaid thik pa thik bad ki kyndon, ia kaba ki parakur ki parakha baroh ki da ia snoh kti lang, ban wan ban ia mih lympung ryngkat ki rang samla ki thei sotti ban pyndep ia ki lai sngi lynter jong kane ka shad.
Ka sngi kaba kut jong ki nongwan iashim bynta ka long ym duna ia ka hynriew spah ngut tam ki nongshad shynrang bad kynthei.
Ki riew pawkhmat ba la wan ban sakhi ne ba wan pynshngain ia kane ka shad ka kmen ba kordor tam ka jaidbynriew ka kynthup naduh u Symbud Myntri Rangbah ka jylla u bah Prestone Tynsong, u MLA ka North Shillong u bah Adelberth Nongrum, u MLA Sohiong u bah Samlin Malngiang lem bad kiwei kiwei ki kynrem ki lyndan.
Ha ki lai sngi lynter kane ka shad ka kmen, la wan ban tep ban put d aka kynhun ki rang samla ba la dep ban shah pyntbit ha ka Sien Riti Institute Wahkhen ryngkat u duhalia samla rangbah u D. Nongsteng (Rit), kiba la ai ia ka sur ksing bad tangmuri kaba da pynhun shisha jrut ia ki nongshad bad kumjuh ia u paid nongwan khmih kai.
Ka jingpynkut ia ka shad ka kmen ka long d aka nguh ka dem ba la ai da u Rgh Hambok Kharmawphlang, ka jingpynhiar ia ka lama ka Seng Khasi da u Rgh P.D Nongrum General Secretary Seng Khasi Kmie bad ia ki kyntien ai khublei la ai da u Rgh Paia B. Synrem Asst Secretary i/c Secretary Literary Committee Seng Khasi Kmie.
Leave a Reply