Hapdeng ka jingjaw ummat la tep lang ia baroh 4 ngut ki lanot twa khyndew ha West Jaintia Hills

Syllad | The Rising MeghalayaOctober 9, 2023

Hapdeng ka jingjaw ummat bad ka jingsngewsih kthang la tep noh ha kajuh ka thliew ia baroh ki sawngut ki dkhot ka longiing kiba la khlad noh na ka jingjia twa khyndew kaba la jia hapoh ka shnong Pynthorlangtein kaba hap hapoh Jowai Police Station, West Jaintia Hills.

Ia kane ka jingleh niam ba khatduh la pyndep haka 9 tarik Risaw ha ka jingiadon ryngkat lang kiba haiing hasem ha u lum jingtep jong ka Balang Presbyterian Pynthorlangteiñ.

Kine ki sawngut ki dkhot ka longiing kaba kynthup ia u kpa, ka kmie bad arngut ki khun ba dang rit ki la duh noh iala ka jong ka jingim na ka jingjia twa khyndew kaba la jia ha ka step phyrngap jong ka Sngi U Blei ba la lah katba ki dang don hapdeng ka jingioh thiah lyngngai.

Kine ki sawngut ki lanot kiba la khlad noh ki kynthup ia u Bah Biangki Phawa 31 snem ka rta, ka kurim jong u ka Kong Pynjanai Ryngkhlem 25 snem ka rta bad ar ngut ki khun kiba dangrit kiba kynthup u Edify Ryngkhlem 6 snem ka rta bad ka Vladaroi Ryngkhlem ba dang 3 snem ka rta.

La pyndep ia kane ka jinglehniam ba khatduh ha phyllaw jong katei ka longiing kaba la ngat ha kane ka apot ha kaba la ioh ia ka jingkren na ka Kur Ryngkhlem, Kur Phawa kumjuh na ka shnong lyngba u Waheh Shnong u Bah A Lipon bad na ka liang ka skul Government LP School Pynthorlangtein.

Hadien ba la pyndep ia ka jinglehniam, la pynkit noh ia ki synduk ba la thep ia kine ki dkhot bad la tep lang noh ha kajuh ka thliew hadien ba la poi sha u lum jintep.

Da ki hajar ngut ki paidbah ki la wan poi na jan najngai ban pynpaw ka jingsngewlem na ka bynta kane ka longiing kaba la mad ia kane ka jingjia kaba sngewsih kthang.