Hapdeng ka jingshongshit kut noh ka Durga Puja

Syllad | The Rising MeghalayaOctober 24, 2023

Ka sngi kaba khatduh jong ka lehniam Durga Puja kala kut hapdeng ka jingshongshit bad kaba iphuh iphieng ha kaba ki riew ngeit Hindu kila leit ban pyngngam um iaki blei durga da kaba suk kaba sain ha ka sngi ba Ar.

Kane ka jingleh niam la pyndep ha Jowai, Nartiang, Dawki ha West Jaintia Hills District bad na East Jaintia Hills District la pyngngam iaki blei Durga ha Jalyiah kiba wan na Khliehriat bad Ladrymbai kumjuh ha Umpleng bad ha ki karkhana dewbilat.

Ha nongbah Jowai ïaka lehniam la pynïaid da ka Sarbajanin Durga Puja Committee ha kaba iaka lehniam leh rukom la pyndep ha Shiv Madir kaba don ha Iawmusiang Jowai.

Haka nohphai sngi ki paid riewngeit ka niam Hindu ki la iamih paidbah da kaba pynkit iaka blei haka kali ban leit bret iaka blei Durga ha wah haka jingsynran ki lang ki longkmie bad ki khynnah kiba la shad lynter lynti naduh na Shiv Mandir haduh ban poi ha wah Myntdu kaba don ha Pohkhyllem kaba la synrang lang ruh da ki bor pynïaid District.

Hadien ba la pynngam um iaka blei teh iaka da u tyllai khnang ban suk ha kaban pynkhuid bad ban iada bad pynneh pynsah ia ka jingkhuid jingsuba jong wah.

Katba ha Nartiang ïaka lehniam Puja la sdang na Mandir ha kaba u Pandit u Oni Maskut Deshmukh ula rah marwei ïaka blei Durga kaba la shna da ka pashor naduh na Durga Mandir shaduh sha wah Myntang ha jingsynran jong u Dolloi, ki pator, ki lyngdoh bad katto katne ngut ki riewngeit hindu lait noh ki kynthei.

Ha kane ka sngi la pyndep ruh iaka lehniam shad mastieh da u Dolloi ka Elaka Nartiang Salong Lamare  ryngkat bad ki pator bad ki lyngdoh jong ka Elaka.

Hashwa ban pynngam um iaka blei Durga ka la don shwa ka jinglehniam harud katei ka wah kaba la kñia da uwei u blang kynsai bad hadien katei la pyllait sa iaka paro.

Ka jinglehniam Puja ha Nartiang ka long kaba iaid beit iaid ryntih khlem kano kano ka jingpynwit pynthud.

Ha sor Shillong iaka jingpyngngam um ka long ha Wah Umkhrah.